TAGBILARAN CITY, Bohol, Oct. 11 (PIA)–Gideklarar ni Presidente Benigno “Noynoy” Aquino III nga regular holiday sa tibuok nasud ang Oktubre 26 isip pakighiusa sa katawhan sa pagsaulog sa Eid’l Adha sa mga Muslim.
Matud pa ni Presidential Spokesman Edwin Lacierda, gilagdaan sa Presidente ang Proclamation No. 488 nga nagdeklarar nga regular holiday sa tibuok nasud sa Oktubre 26 agig pagsaulog sa Eid’l Adha o Feast of Sacrifice sa mga igsoon natong Muslim.
Ang Eid’l Adha usa sa pinakamahinungdanong kasaulogan sa mga Islam sa tibuok kalibotan mao nga gi-rekomendar kini sa National Commission on Muslim Filipinos (NCMF) kang Presidente Aquino nga ideklarar nga regular holiday isip pakighiusa sa katawhang Pilipino sa Muslim community sa pagsaulog sa Eid’l Adha.
Nagpasabot kini nga duha ka sunod-sunod nga long weekend ang gipaabot sa katawhan. Kini tungod kay special non-working days man usab ang Nobyembre 1, Huwebes (All Saints Day ) ug Nobyembre 2, Biyernes ( All Souls Day) base sa Proclamation No. 295 nga gilagdaan na daan sa Presidente niadto pang Nobyembre 24, 2011. (PIA-Bohol/ecb/p-hd)
