MANILA, Dec. 20 (PIA)–Gilagdaan na ni Presidente Benigno ‘Noynoy’ Aquino III karong adlawa ang P2.265-trilyon national budget alang sa sunod tuig.
Mas ubos ang gilagdaang pondo sa Presidente kun itandi sa iyang giduso nga P2.268 trilyon.
Gitangtang na sa 2014 budget ang kontrobersyal nga Priority Development Assistance Funds (PDAF) sa mga magbabalaod, human sa giingong mga maanomaliyang paggamit niini.
Ni-gamay ang maong pondo human ipatangtang sa 15 ka senador ang ilang PDAF nga nagkantidad og P200 milyon, apil na usab ang social fund ni Bise-Presidente Jejomar Binay nga P200 milyon.
Una nang gimando sa Presidente ang pagbasura sa PDAF pila ka adlaw human miboto ang giingong pag-abusar sa pila ka magbabalaod sa maong pondo.
Nidason usab niini ang Korte Suprema nga wala nahi-uyon sa batakang balaod ang PDAF mao nga gimando niining ihunong ang pagpagawas sa maong pondo.
Sa iyang mensahe human sa paglagda sa nasudnong budget, gituki sa Presidente ang kalig-on sa nasud taliwala sa mga milabay nga katalagman sama linog sa Bohol, tensyon sa Zamboanga, ug pagpanghasi sa super typhoon Yolanda sa Visayas. Tungod niini, gisaka sa P13 bilyon ang calamity fund sa 2014. (PIA7-Bohol/ECB)
Unilateral ceasefire, gideklarar sa gobyerno
MANILA, Dec. 20 (PIA)–Nagdeklarar na ang gobyerno og unilateral ceasefire sa mga rebeldeng miyembro sa Communist Party of the Philippines-New People’s Army (CPP-NPA).
Matud pa ni Presidential Spokesperson Edwin Lacierda, gi-aprubahan na ni Presidente Benigno ‘Noynoy’ Aquino III ang rekomendasyon ni Defense Secretary Voltaire Gazmin nga
magdeklara og unilateral ceasefire.
Ang maong ceasefire molanat og 26 ka adlaw gikan Disyembre 21, 2013 hangtud Enero 15, 2014.
Una nang nagdeklarar og 6 ka adlaw nga ceasefire ang CPP-NPA gikan Disyembre 24 hangtud 26 ug Disyembre 31 hangtud Enero 2.
Gipasalig ni Lacierda nga taliwala sa deklarasyon sa unilateral ceasefire, naka-defensive mode pa gihapon ang kasundalohan aron panalipdan ang publiko. (PIA7-Bohol/ECB)