P2.606-T budget sa 2015,
gipalig-on na sa Kamara
MANILA, Oct. 30 (PIA)–Taliwala sa planong pagbabag sa mga taga oposisyon, gipalig-on na sa ikatulo ug katapusang pagbasa sa Kamara ang P2.606 trilyon nga nasudnong budget sa 2015.
Migawas sa resulta sa botohan nga 197 ka kongresista ang mi-botar nga ipasar na kini batok sa 27 nga dili pabor niini ug walay nag-abstain.
Aprubado na usab sa ikatulong pagbasa ang House Bill (HB) No. 4968 o ang General Appropriations Bill of 2015 taliwala sa plano sa oposisyon nga babagan kini tungod sa errata.
Nahisulod na sa budget ang sulod sa 269 ka pahinang errata nga giduso sa Malakanyang nga gi-kuwestiyon sa pipila ka kongresistang gikan sa oposisyon.
Walay nabag-o sa 10 ka nag-unang ahensya nga pinakadaku og alokasyon nga mao ang: Department of Education (DepEd), Department of Public Works and Highways (DPWH), Department of National Defense (DND), Department of the Interior and Local Government (DILG), Department of Social Welfare and Development (DSWD), Department of Health (DoH), Department of Agriculture (DA), Department of Transportation and Communication (DOTC), Department of Environment and Natural Resources (DENR) ug ang Hudikatura.
Nahimong tensyonado ang deliberasyon ug botohan sa budget nga niabot pa sa pagsaka sa tingog sa pipila ka taga-oposisyon nga gustong babagan ang budget apan nipatigbabaw ang intensyon sa mayorya nga palig-onon dayon ang nasudnong pondo. (ecb/PIA7-Bohol)