MANILA, Dec. 23 (PIA)–Gilagdaan na ni Presidente Benigno ‘Noynoy’ Aquino III ang P2.606 trilyon national budget.
Sa iyang mensahe, miingon si PNoy nga ang sulod sa baga nga libro mao ang matag piso nga probisyong nahisulod nga nagsimbolo sa kolektibong tinguha nga ipasaka ang matag usa ug palambuon ang nasud.
Giingong kini ang pagmatuod sa gisaad nga pagbag-o ug walay mahabilin sa ‘tuwid na daan.’
Sa maong General Appropriations Act of 2015, nakuha gihapon sa Department of Education (DepEd) ang gitawag nga lion’s share nga P364.9 bilyon; gisundan sa Department of Public Works and Highways (DPWH) nga adunay P300.5 bilyon ug Department of National Defense (DND), P144 bilyon.
Sa sectoral allocation, nakuha sa social services ang pinakadakung appropriation diin ang social protection and welfare services nakakuha og 37.1 porsiyento o P967.9 bilyon ug gastohon kini sa Conditional Cash Transfer Program, Health Insurance ug Education.
Ang CCT program partikular nga nakadawat og P64.7 bilyon aron suportahan ang 4.4 milyon beneficiaries, samtang ang health insurance, P37.2 bilyon.
Samtang ang P52.7 bilyon gigahin sa pagpatukod og basic education facilities nga gilangkoban sa 31,728 nga bag-ong classrooms ug 13,586 water and sanitation facilities.
Ang economic services adunay P700.2 bilyon samtang P399.4 bilyon sa debt payment o pambayad sa utang.
Nahatagan usab ang general public services og budget nga P423.1 bilyon samtang ang defense spending adunay P115.5 bilyon.
Ang ubang department sama sa Department of Interior and Local Government (DILG) adunay P141.4 bilyon; Department of Social Welfare and Development (DSWD) – P108.970 bilyon; Department of Health (DOH) – P102.2 bilyon; Department of Agriculture (DA) – P88.8 bilyon; Department of Transportation and Communication (DOTC) – P59.4 bilyon; Department of Environment and National Resources (DENR) – P21.29 bilyon; samtang ang judiciary – P20 bilyon. (ecb/PIA7-Bohol)