MANILA, Dec. 05 (PIA)–Mokabat sa kinatibuk-ang P242 milyon ang kantidad sa mga tambal ug uban pang kinahanglanong mga butang sa panglawas ang gi-andam na sa Department of Health (DOH) alang sa Sidlakang bahin sa Kabisay-an nga gipaabot nga maoy labyan sa bagyong Ruby sa Sabado sa hapon.
Atol sa gipahigayong National Disaster Risk Reduction and Management Council (NDRRMC) meeting kagahapon nga gipangunahan ni Presidente Benigno ‘Noynoy’ Aquino III, gibutyag ni DOH Kalihim Janette Garin nga gawas niini, nag-andam pa usab sila og P48 milyon nga dugang pondo gikan sa ilang ulohang buhatan, apil na usab ang mga body bags nga mahimong ipangapud-apud sa mga buhatan nila sa lalawigan sa mga lokal nga kagamhanan kun kinahanglanon kini.
Gudang pa ni Garin, naka Blue Code alert na sila nga nagpasabot nga katunga o 50 porsiyento sa mga kawani nila ang mo-report sa mga ospital ug mga barangay health centers.
Matud pa nga sa Sabado, ang DOH ibutang na sa Code Red alert mao nga tanan nilang kawani o 100 porsiyento, kauban na ang naa sa mga tambalanan, mo-report sa ilang mga opisina aron makatubag sa mga panginahanglan sa katawhan.
Nagmugna na usab sila og mga standby teams ug gigahinan na kini og pondo sa buhatan.
Ang mga buhatan sa panglawas ug mga ospital gihatagan na usab og cash advances ug hugot nga makig-alayon sa ulohang buhatan ug mga barangay health centers.
Gi dugang usab ni Garin nga usa ka satellite phone gikan sa V. Luna General Hospital ang ipadala sa Sidlakang bahin sa Kabisay-an karong adlawa, gawas pa sa mga motorsiklo ug bisikleta nga gi-rentahan sa buhatan aron magamit sa pag-adto sa mga dapit nga posibleng dili na maagian sa mga ordinaryong sakyanan tungod sa bagyo. (ecb/PIA7-Bohol)