TAGBILARAN CITY, Bohol, Sept. 05 (PIA)–Gipapas sa Malakanyang ang kahadlok nga magamit sa eleksyon sa 2013 ang P317 bilyong special purpose fund ni Presidente Benigno “Noynoy” Aquino.
Tubag kini sa Palasyo sa pahayag ni kanhi National Treasurer ug University of the Philippines (UP) Professor Leonor Briones nga angay ipasabot sa Presidente kun asa gamiton ang pondo tungod kay delikadong magamit lang kini sa eleksyon.
Gitataw ni Deputy Presidential Spokesperson Abigail Valte nga transparent ang paghimo sa budget sa administrasyong Aquino.
Giingong kauban pa ang mga civil society organizations sa paghimo sa budget ug kanunay man matubag sa Department of Budget and Management (DBM) ang mga pangutana kalabot niini.
Matud pa ni Valte nga klaro nga makita man sa website sa DBM nga www.dbm.gov.ph ang mga pasabot sa paggamit sa budget sa Office of the President (OP). (PIA-Bohol/ECB/I-gg)
Bag-ong certificate of candidacy form, ipatuman sa Oktubre
TAGBILARAN CITY, Bohol, Sept. 05 (PIA)–Bag-o na ang gamitong form sa filing of certificate of candidacy sa Commission on Elections (Comelec) sa sunod buwan.
Matud pa ni Comelec Chairman Sixto Brillantes, gi-sapinal na nila ang bag-ong certificate of candidacy (COC) form nga gamiton sa mga nagtinguhang molansad sa 2013 elections.
Oktubre 1-5 ang deadline sa filing sa COC.
Giingong adunay parte sa bag-ong form diin ibutang sa mga kandidato kun rehistrado na siyang botante o magparehistro pa lamang.
Kini tungod kay ipahigayon man ang filing sa COC sa dili pa matapos ang pagparehistro sa mga botante nga ang deadline hangtud Oktubre 31.
Ang mga modagan sa mga lokal nga posisyon moduso sa ilang COC sa provincial, city ug municipal election officers, samtang ang mga modagan lang sa national positions ang moadto sa main office sa Comelec. (PIA-Bohol/ECB/P-gg)