TAGBILARAN CITY, Bohol, Aug. 28 (PIA)–Aprubado na sa Senate committee on finance ang P44.26 bilyon nga pondo alang sa conditional cash transfer (CCT) program sa administrasyong Aquino.
Parte pa kini sa budget deliberation sa komite ni Sen.Franklin Drilon sa P2.006 trilyon proposed 2013 national budget.
Gikan sa P39.45 bilyon karong tuig alang sa CCT nga mas giila usab sa tawag nga Pantawid Pamilyang Pilipino Program, gidugangan kini sa Malacañang alang sa 2013 og 12.2 percent ug gipaabot nga makapahimos niini ang dugang 700,000 ka pamilya.
Base sa report sa DSWD, ang pamilyang nakapahimos na karong tuiga sa CCT misaka na sa kapin 3.1 milyon.
Ang P44.26 bilyon nga pondo sa CCT ang nagrepresentar sa 78.8 percent sa proposed 2013 budget sa DSWD nga P56.2 bilyon nga submitted na for plenary deliberation human mipasar sa committee level. (PIA-Bohol/ECB/I-hd)
