TAGBILARAN CITY, July 4 (PIA)–Gipagawas niadtong Biyernes, Hulyo 1 sa Malakanyang ang labing unang memorandum circular sa administrasyon ni Presidente Rodrigo Duterte nga alang sa mga opisyal ug empleyado sa gobyerno nga gitudlo sa niaging administrasyon ni kanhi Presidente Benigno ‘Noynoy’ Aquino III.
Ubos sa Memo¬randum Circular No. 1, tuyo niining lugwayan hangtud Hulyo 31, 2016 ang pag-alagad sa mga opisyal ug empleyado sa gobyerno ubos sa administrasyong Aquino.
Gihimo ni Duterte kining maong lakang aron maseguro ang hapsay nga transisyon ug turnover sa mga rekord ug dokumento sa mga departamento sa gobyerno.
Apil sa mga rekord ug dokumentong nahisgotan mao ang mga “hard and e-copies” nga giingong kinahanglang ma-turn over sa ilang mga manununod o sa pinakataas nga career official/personnel nga gi-alagaran nilang ahensya sa gobyerno.
Magpabilin sila sa gobyerno hangtud sa katapusan sa Hulyo, gawas lang kun bawion na ang ilang appointment, dawaton ang resignasyon, may nakita nang ihulip kanila o gihatagan sila og reappointment. (ecb/PIA7-Bohol)