TAGBILARAN CITY, Bohol, July 25 (PIA)–Dili babagan ni Presidente Benigno “Noynoy” Aquino III ang Kongreso sa tinguha niining amyendahan ang Konstitusyon.
Matud pa ni Deputy presidential spokesperson Abigail Valte, buwag nga sangay sa gobyerno ang Kongreso mao nga dili kini mahimong babagan sa Presidente.
“Independent po ‘yan. They can move as they will,” ingon ni Valte.
Gipasabot og balik sa Palasyo nga andam ang Presidente nga paminawon silang Senate President Juan Ponce Enrile ug House Speaker Sonny Belmonte sa giduso niining mabag-o ang posisyon niini batok sa pag-amyenda sa Batakang Balaod.
Gitataw usab ni Valte nga dili na kinahanglang sertipikahan isip urgent ang ilang balaodnon sama sa Reproductive Health (RH) Bill, Armed Forces of the Philippines (AFP) Modernization Bill, Sin Tax Bill ug Anti-Money Laundering Act (AMLA) tungod kay una na kining gihimong priority measure human ang Legislative, Executive Development Advisory Council (LEDAC) meeting ning bag-o lang.
Giingong wala usab gipugos sa Presidente ang Kongreso nga ipasar ang RH Bill ug gentle reminder lamang ang giingon niini sa mga magbabalaod.
Dugang pa ni Valte, wala gi-balewala sa administrasyon ang Freedom of Information Bill (FOI) tungod kay mismong bersyon sa Palasyo ang gikuha sa Kongreso ug gipaabot nga mapalabang na kini sa committee level sa Kamara sa sunod buwan. (PIA-Bohol/ecb)
Nag-unang pantalan sa nasud, pagapondohan sa DOTC
TAGBILARAN CITY, Bohol, July 25 (PIA)–Pagapondohan sa Department of Transportation and Communications (DOTC) og halos P600 milyon ang mga rehibilitasyon sa mga nag-unang pantalan sa nasud.
Matud pa ni DOTC Secretary Mar Roxas, pangunahan sa Philippine Ports Authority (PPA) ang proyektong nagkantidad og P556 milyon.
Apil sa mga pantalan nga ipaubos sa rehabilitasyon ang Iloilo Commercial Port Complex, Albay Tabaco Port , Ormoc Port sa Leyte, Dumaguete Port sa Iloilo, Lucena City Port, Dumangas Port ug Pio Duran Port sa Albay.
Dugang pa sa kalihim, tinguha usab sa maong proyekto nga mapanindot pa ang serbisyo tungod sa pagdaghan sa mga pasahero ug kargamentong ipagawas ug ikanaug sa mga nag-unang pantalan sa nasud. (PIA-Bohol/ecb)
Plano sa China sa pagtukod og military post sa Spratlys, gi-protesta sa PH
TAGBILARAN CITY, Bohol, July 25 (PIA)–Gipatawag sa Department of Foreign Affairs (DFA) si Chinese Ambassador Ma Keqing aron ipaabot ang bag-ong reklamo sa Pilipinas batok sa desisyon sa China nga magtukod og garrison o military post sa Spratlys.
Gi-anunsyo sa defense ministry sa China ang planong operasyon sa ilang tropa sa Woody Reef.
Una nang niduso og reklamo ang Pilipinas sa pagtukod sa China og Sansha City sa gi-ilogang Spratly Islands nga nabalita na niining semanaha nga adunay kaugalingong mayor ug mga lokal nga opisyal na.
Bisan pa niini, miingon ang tigpamaba sa DFA nga si Raul Hernandez nga ipabilin sa gobyerno ang diplomatikong paagi aron magbaton og malinawon nga resolusyon sa isyu.
Kining duha ka bulag nga protesta ang ika-13 ug ika-14 na nga diplomatic protest nga gisang-at sa China sukad miulbo ang tensyon sa Spratlys sa milabay nga buwan sa Abril. (PIA-Bohol/ecb)
Rojas, bag-ong NBI director
TAGBILARAN CITY, Bohol, July 25 (PIA)–Gitudlo na ni Presidente Benigno “Noynoy” Aquino III isip permanenteng National Bureau of Investigation (NBI) director si officer in charge Nonnatus Caesar Rojas.
Si Rojas ang napili sa Presidente isip NBI chief gikan sa 6 ka pangalan nga naa sa listahang giduso ni Justice Sec. Leila de Lima.
Epektibo ang permanent appointment ni Rojas isip NBI director sugod niadtong Hulyo 20, matud pa sa gilagdaang appointment niini ni Presidente Aquino.
Unom ka buwan usa ni desisyon si Aquino nga itudlo si Rojas nga unang gibutang isip OIC.
Sa wala pa gibutang sa NBI, acting director si Rojas nga nagsilbi kining state prosecutor sa Region 1.
Gihulipan niini ang gipalagpot nga NBI director nga si Magtanggol Gatdula nga gi-akusahan og kidnapping ug extortion sa usa ka Japanese national.
Apil sa mga gipilian ni PNoy sa posisyon silang CIDG director Samuel Pagdilao ug kanhi PNP chief Raul Bacalzo. (PIA-Bohol/ecb)