TAGBILARAN CITY, Bohol, Aug. 07 (PIA)–Giseguro karon sa gobyerno nga dili makaapekto sa nagpadayong peace process sa Moro Islamic Liberation Front (MILF) ang pag-atake sa Bangsamoro Islamic Freedom Movement (BIFM) sa pipila ka lungsod sa Maguindanao.
Matud pa ni Peace Adviser Teresita Deles, kumbinsido sila nga tumong sa pagpanghasi og kagubot nga gihimo sa grupo ni Ameril Umbra Kato nga madiskaril ang peace talks tali sa gobyerno ug MILF.
Dugang pa ni Deles, dili komedya ang gi-agian nga proseso sa mga nasugdan sa negosasyon mao nga dili kini basta maadto lamang sa wala.
Sa pagsugod sa ika-30 nga formal peace talks sa Kuala Lumpur Malaysia karong Domingo, giingong nagpabilin ang pagpursige sa gobyerno sa pakighisgot sa MILF hangtud makab-ot ang final agreement sa gitinguhang kalinaw sa Mindanao.
“This act of aggression of the BIFM is meant to derail the peace process between the government and the MILF. We assure the public that these incidents will not affect the substantial gains that we have carefully and persistently built with our counterparts,” matud pa ni Deles.
Una nang gi-kondenar sa gobyerno ang pagpanghasi og kagubot ug giseguro niini ang hustisya batok sa mga mi-atakeng rebelde. (PIA-Bohol/ecb)
BSP, magpagawas na og salaping disenyo alang sa mga buta
TAGBILARAN CITY, Bohol, Aug. 07 (PIA)–Magpagawas na ang Bangko Sentral ng Pilipinas (BSP) og mga salaping may disenyo alang sa mga adunay kakulian sa panan-aw.
Sa gipahigayong budget hearing, miingon ang BSP officials nga apil ang maong proyekto sa ilang mga nakalaray nga programa.
Giingong katuyuan niining makatabang sa mga buta, aron dili na sila mabiktima sa mga pangilad kalabot sa pekeng salapi o sayop nga kantidad sa peso bill.
Matud pa ni BSP Governor Amando Tetangco, dugay na nila kining plano mao nga gusto nilang mapatuman sa mas daling panahon.
Apan gitataw niini nga magpabilin pa ang daang disenyo tungod sa pipila ka features lamang ang ilang idugang.
Sa katapusang parte sa tuig gipaabot nga mapagawas na ang maong mga bag-ong salapi sa BSP. (PIA-Bohol/ecb)