TAGBILARAN CITY, Bohol, Oct. 16 (PIA)–Gisugyot sa mga lokal nga opisyal sa lalawigan sa Bohol nga i-oktaba una ang piniliay sa umaabot nga barangay elections human naigo sa magnitude 7.2 nga linog ang lalawigan Martes sa buntag.
Matud pa ni Bohol Governor Edgar Chato, moduso og resolusyon ang kagamhanang probinsiyal sa Commission on Elections (Comelec) aron hatagan ang lalawigan og special elections.
Gipaubos na sa state of calamity ang lalawigan sa Bohol dungan sa Cebu.
Ubos sa Section 5 sa Omnibus Election Code, gitugotan ang pag-oktaba sa eleksyon sa panahon sa kagubot, terorismo, halapad nga kadaut sa mga election paraphernalia o election records kun adunay “force majeure” o kalamidad.
Sa labing ulahing taho, giingong tukion sa mga Comelec commissioner sa ipahigayong en banc session ugma kun ipadayon ba o dili ang nagsingabot nga barangay elections sa umaabot Oktubre 28 sa mga dapit nga grabeng naapektuhan sa linog. (PIA7-Bohol/ECB)