TAGBILARAN CITY, Bohol, Sept. 11 (PIA)–Aksidente o walay foul play ang pagkahagsa sa eroplanong gisakyan ni Interior and Local Government Secretary Jesse Robredo niadtong Agosto 18.
Mao kini ang gipahayag ni Civil Aviation Authority of the Philippines (CAAP) Deputy Director General Captain John Andrews sa gihimong congressional oversight committee hearing.
Giingong mao kini ang nigawas sa inisyal nga imbestigasyon apan nangayo pa og executive session ang mga opisyal sa CAAP.
Matud pa ni Andrews, naka-sentro ang investigating committee sa mismong makina sa Piper Seneca plane, samtang adunay buwag nga imbestigasyon ang CAAP aron mahibaw-an kun adunay angay manubag sa maong aksidente ug kinsa kini sila.
Samtang nagtuo usab si Senador Ramon Revilla nga nalikayan unta ang aksidente sa kalihim kun may kawani pa sa Masbate Airport Tower sa nahitabong aksidente.
Nahibaw-an nga operational lamang ang Masbate Airport gikan sa alas-6:00 sa buntag hangtud 2:00 sa hapon. (PIA-Bohol/ECB/I-gg)
Imbestigasyon sa Senado kang DILG Usec. Puno, magsugod sa Biyernes
TAGBILARAN CITY, Bohol, Sept. 11 (PIA)–Moatubang na sa imbestigasyon sa Senado si Department of Interior and Local Government (DILG) Undersecretary Rico Puno sa Biyernes.
Kalabot kini sa giingong kontrobersyal nga pag-adto niini sa condominium ug opisina sa namatay nga si DILG Sec. Jesse Robredo.
Mismong ang Senate Committee on Constitutional Amendments, Revision of Codes and Laws ni Senator Miriam Defensor-Santiago ang mopahigayon sa pagdungog.
Gawas kang Puno, ipatawag usab sa Senado sila Executive Secretary Paquito Ochoa, Environment Sec. Ramon Paje, Justice Sec. Leila De Lima, bag-ong DILG Sec. Mar Roxas, PNP Chief Director General Nicanor Bartolome, Lingayen-Dagupan Archbishop Oscar Cruz ug ang asawa ni Sec. Robredo nga si Atty. Leni Robredo.
I-apil usab sa imbestigasyon ang napabalita nga pagkalambigit ni Puno sa jueteng ug illegal logging.
Samtang giingong ang dokumento nga posibleng maglambigit kang Puno sa giingong maanomalyang bidding sa rifle deal sa Philippine National Police (PNP) ang tuyo sa undersecretary sa condominium ni Robredo. (PIA-Bohol/ECB/I-gg)
