MANILA, Mar. 25, 2014 (PIA)–Nagpahigayon na ang Department of Health (DoH) og halapad nga kampanya aron batokan ang pagkatap sa sakit nga tuberculosis (TB).
Kini aron padayong makab-ot ang ilang target nga himuong TB-free ang Pilipinas sa mga mosunod nga tuig.
Ang tema sa kampanya sa DoH karong tuig mao ang: “Stop TB: Makialam, Tara Na!” nga ang tumong mao ang pag-aghat sa publiko nga motabang na usab sa mga kampanya batok TB.
Kalabot niini, gikalipay ni DoH Secretary Enrique Ona ang nadawat nga mga suporta gikan sa nagkalin-laing sektor batok sa TB kalabot na usab sa programang KP: Kalusugang Pangkalahatan.
Matud pa ni Ona, gusto nilang makuha ang pakigtambayayong sa publiko aron masiguro nga ang matag Pilipino nga adunay sakit nga TB, mapatambalan ug mamaayo sa maong sakit.
Gitambagan sa DoH ang publiko nga kun makitaan og mga sintomas sa TB, moadto gayud dayon sa pinakaduol nga health center alang sa libreng pagpatambal niini. (PIA7-Bohol/ECB)
Embahada sa Israel sa PH ug sa tibuok kalibotan, kasamtangang ipasarado
MANILA, Mar. 25, 2014 (PIA)–Gipahibalo sa Embahada sa Israel sa Pilipinas ang kasamtangang pagpasarado niini apil na usab sa uban pang Embahada sa Israel sa tibuok kalibotan.
Giingong ang desisyon nga ipasarado ang mga Embahada sa Israel gihimo sa Foreign Ministry’s Employee’s Labour Union.
Kini taliwala sa wala pagkab-ot sa Ministry of Finance sa mga hangyo sa mga mamumuo sama sa igo ug makatarunganong suholan.
Sugod karong adlawa, dili na mag-abli ang mga embahada. Bisan ang mga preparasyon alang sa mga transaksyon sa Israel sa ubang nasud, kasamtangan usab nga ipahunong.
Giingong wala usab una ang mga pagbisita ug bisan unsang “cultural activities” ang ipahigayon samtang ang mga aid o tabang ug development programs, ipahunong usab.
“We, as Israeli diplomats feel a great responsibility to our country and to our profession and because of this we feel that we have no choice but to take this drastic step in order to facilitate the changes that are so much needed at our ministry. We hope that by this course of action we can influence others in insuring that we and our families and our ministry have a more prosperous future”, matud pa sa notice nga gipagawas sa embahada. (PIA7-Bohol/ECB)