MANILA, Dec. 02 (PIA)–Gipangunahan ni Presidente Benigno ‘Noynoy’ Aquino III ang pagsugod sa usa ka tuig nga pagpangandam alang sa Asia Pacific Economic Cooperation (APEC) nga ipahigayon sa Pilipinas sa 2015.
Dungan niini, gilusad usab niadtong Lunes ang official logo sa APEC 2015 Philippines apil na ang website nga magpagawas og update sa summit nga may temang “Building Inclusive Economies, Building a Better World.”
Ipahigayon ang APEC Ministerial Meeting gikan Nobyembre 12 hangtud 16 sa sunod tuig nga pagatambongan sa mga lider sa 21 ka miyembrong nasud.
Sa dili pa kini, adunay ipahigayong mga panag-pulong matag buwan sa 2015 sa nagkalain-laing syudad sa Pilipinas.
Sa Twitter post sa APEC 2015, nakabutang nga sa sunod semana, host sa APEC Informal Senior Officials’ Meeting ang syudad sa Legazpi sa Albay.
Matud pa ni PNoy, usa kini ka maayong kahigayonan aron ipakita og balik sa kalibotan ang ka-anindot ang atong nasud.
“This 2015, visitors from APEC economies will witness for themselves the vibrancy of an inclusive and growing nation. In Manila and beyond, they will have the opportunity to experience locations around our country that largely contribute to the dynamism and the rich culture of the Philippines.”
Giingong kahigayonan usab kini alang sa mga langyaw nga tigpamuhunan nga ma-agda aron mamuhunan sa atong nasud.
Halos duha ka dekada na ang milabay sa dihang katapusang ni-host sa APEC ang Pilipinas niadtong 1996. (ecb/PIA7-Bohol)