TAGBILARAN CITY, Bohol, Sept. 10 (PIA)–Nagpagawas ganinang buntag og temporary restraining order (TRO) ang Supreme Court (SC) batok sa pagpagawas sa Priority Development Assistance Fund (PDAF) o pork barrel sa mga magbabalaod ubos sa General Appropriations Act of 2013.
Kini ang nauyonan sa mga mahistrado sa Korte Suprema human sa gipahigayon nilang en banc session ganinang buntag.
Una nang gi-suspender ni Presidente Benigno ‘Noynoy’ Aquino III ang pagpagawas niini.
Sakop sa maong TRO ang pork barrel sa mga magbabalaod gikan sa nahabiling 2013 budget ug apil usab ang Malampaya funds gawas lamang kun gamiton sa mga programang may kalabot sa energy development.
Gihiusa na sa Korte Suprema ang tulo ka petisyon batok sa pork barrel ug Malampaya funds.
Gihatagan sa SC ang mga petisyuner ug respondents og 10 ka adlaw sa pagduso sa ilang komento.
Gitakda usab sa SC ang oral argument sa Oktubre 8 sa alas 2:00 sa hapon alang sa maong hisgotanan. (PIA-Bohol/ecb)
