TAGBILARAN CITY, May 19 (PIA)–Gipahibalo sa Government Service Insurance System (GSIS) nga padayon pa gihapon sila sa pagdawat og mga aplikasyon alang sa GSIS Scholarship Program (GSP) hangtud Hunyo 10, 2016.
Isip preparasyon sa nagsingabot nga Academic Year 2016-2017, gidugangan sa GSIS ang gidaghanon sa mga mahimong scholars gikan 200 ngadto na sa 400.
Gawas sa tuition ug miscellaneous fee nga dili molapas sa P40,000, sakop usab sa scholarship program ang dugang P1,000 sa monthly allowance nga karon mokabat na sa P3,000.
Ang maong programa bukas alang sa mga anak ug benepisyaryo sa kwalipikadong miyembro sa ahensya.
Gawas sa anak ug dependent sa mga aktibong miyembro, sakop usab sa maong programa ang mga anak sa mga miyembrong adunay kakulian sa panglawas o Permanent Total Disability pensioner.
Ang GSP bukas alang sa mga bag-ong tinun-an ug mga estudyanteng kasamtangang naa sa kolehiyo ug nikuha og kursong dili mo-ubos sa upat hangtud lima ka tuig.
Apil usab sa programa ang paghatag og ayudang P20,000 alang sa cum laude, P30,000 alang sa magna cum laude ug P50,000 alang usab sa suma cum laude nga benipesyaryo sa GSP.
Matud pa sa ahensya, maka sumiter lamang ang kwalipikadong anak sa usa ka aktibong myembro kun may tulo ka tuig na kining mialagad sa gobyerno, tighulog sa saktong premium contribution sa katapusang unom ka buwan ug may salary grade nga 24 o mas ubos pa.
Samatang mahimo usab mosumiter sa ilang dokumento ang mga aplikante pinaagi sa GSIS Wireless Automated Processing System (GWAPS) kiosk nga makita sa nagkalain-laing sangay nga ahensya, mga kapitolyo ug kagamhanang lokal nga may nakabutang niini. (ecb/PIA7-Bohol)