MANILA, Mar. 4, 2014 (PIA)–May pagtugot na ni Presidente Benigno “Noynoy” Aquino III ang pagtangtang sa 11 ka Government Owned And Controlled Corporations (GOCCs).
Pipila niini ang nalambigit sa pork barrel scam isip kauban sa anomaliya sa mga pekeng proyekto nga gi-pondohan sa Priority Development Assistance Fund (PDAF).
Una nang gi-aprubahan sa Presidente ang pagwagtang sa National Agribusiness Corp. (NABCOR), Zamboanga Del Norte Rubber Estate Corp. (ZREC), Human Settlements Development Corp. (HSDC), Philippine Forest Corp. (PFC) ug Cottage Industry Technology Center (CITC) sa dili pa matapos ang 2013.
Gawas niini, ipatangtang na usab ni Presidente Aquino ang Southern Philippines Dev’t. Authority (SPDA), Philippine Fruits and Vegetables Corporation (PFVC), San Carlos Fruits Corporation (SCFC), Philippine Agricultural Development And Commercial Corporation (PADCC), Bataan Technology Park, Inc. (BTPI) ug PNOC Shipping And Transport Corporation (PNOC-STC).
Matud pa ni Paolo Salvosa, ang tigpamaba sa Governance Commission for GOCCs, ilang e-evaluate ang performance sa matag usa sa mga nahisgotang buhatan, hatagan og separation payment ug tun-an ang pagbalhin sa ubang apektadong empleyado ngadto sa ubang buhatan sa gobyerno. (PIA7-Bohol/ECB)
