MANILA, October 24 (PIA)–Gipahinumdoman sa Department of Labor and Employment (DOLE) ang nagkalain-laing kumpanya kalabot sa pagpahigayon og random drug testing sa ilang mga empleyado.
Matud pa ni DOLE Kalihim Silvestre Bello III, istrikto kining ipatuman sa ahensiya base sa Department Order 53-03 kalabot sa mga sumbanan sa mga polisiya ug programa sa Drug-Free Workplace.
Nahisulod sa maong department order ang tanang naa sa pribadong sektor, bisan ang mga contractor ug concessionaires niini.
Gawas sa mga polisiya ug programa kalabot sa drug abuse prevention and control, giingong angay usab hingosgan sa mga sektor ang pag-implementar sa adbokasiya, edukasyon, pagbansay, drug testing program, treatment, rehabilitation and referral, ug monitoring and evaluation alang sa ilang mga empleyado.
Kun mogawas nga positibo ang usa ka empleyado, gitataw ni Bello nga dili angay tangtangon dayon sa trabaho ang apektadong empleyado ug angay tun-an ang resulta ug tinoon ang panginahanglan niini.
Gidugang pa sa Kalihim nga kinahanglang giyahan kini sa rehabilitation centers sa Department of Health (DOH) ilabi na kun unang higayon pa nga nag-positibo ang empleyado sa maong drug testing. (ecb/PIA7-Bohol)