TAGBILARAN CITY, Bohol, July 10 (PIA)–Giseguro sa Malakanyang nga dili pasagdan ang libuan ka overseas Filipino workers (OFWs) nga apektado sa giingong freeze hiring tungod sa wala pag-renew sa kontrata sa Taiwan.
Matud pa ni Presidential Communications Group Secretary Sonny Coloma, padayong nangita ang gobyerno og trabaho alang sa mga apektadong OFWs.
Gawas sa Pilipinas, giingong gitan-aw usab nila ang oportunidad alang sa mga Pinoy sa ubang nasud.
Gi-aghat usab ang mga OFWs sa pagbisita sa Philippine Overseas Employment Administration (POEA) website alang sa mga aprobadong job orders sa tanang nasud.
Una nang gikompirmar ni Manila Economic and Cultural Office (MECO) Chief Amadeo Perez Jr. nga panimalos sa Taiwan ang wala pag-renew sa kontrata sa mga OFWs ug wala pag-isyu og working visa sa Taiwan tungod sa pagkamatay sa mangingisdang Taiwanese sa Balintang Channel.
Giingong padayon usab nga gitun-an ni Presidente Benign ‘Noynoy’ Aquino III ang report sa National Bureau of Investigation (NBI) nga gisumite sa Department of Justice (DOJ) kalabot sa Balintang incident. (PIA-Bohol/ecb)
OFW deployment sa Egypt, suspendido
TAGBILARAN CITY, Bohol, July 10 (PIA)–Kasamtangang gi-suspender karon sa gobyerno sa Pilipinas ang deployment sa mga bag-ong overseas Filipino workers (OFWs) nga mo-trabaho sa Egypt.
Matud pa ni Department of Foreign Affairs (DFA) spokesperson Raul Hernandez, parte kini sa precautionary measures sa gobyerno human gi-isa sa level 2 ang alert crisis sa maong nasud tungod sa nagpadayong kagobot didto.
Gitumbok ni Hernandez nga base sa taho sa Philippine embassy sa Cairo, mas ni-grabe pa ang tensyon sa tibuok Egypt human gipalagpot sa militar si Egyptian President Mohamed Morsi.
Alang sa mga OFWs nga adunay existing contracts, gi-klaro sa opisyal nga mahimo pa gihapon nilang ipadayon ang ilang byahe apan hugot silang gipahinomdoman nga mag amping gayud.
Ubos sa alert level 2, gitambagan ang mga Pinoy nga likayan ang mga non-essential movements ug pag-adto sa mga lugar nga adunay bagang duot sa katawhan ilabi na ang mga sentro sa kagubot.
Giingong gi-andam sa usab sa DFA ang posibleng pagpabakwit sa mga Pinoy kun gikinahanglan na kining buhaton. (PIA-Bohol/ecb)