TAGBILARAN CITY, Bohol, Nov. 14 (PIA)–Andam ang Malacañang nga tabangan ang Moro Islamic Liberation Front (MILF) sa paghubad ug pagpang apud-apud sa Framework Agreement sa nagkain-laing pinolongan aron mas masabtan kini sa mga Muslim sa Mindanao.
Matud pa ni Presidential Spokesman Edwin Lacierda, katuyuan usab nilang mapasaka ang awareness o kahibalo sa mga apektadong residente sa gilagdaang kasabotan.
Sa regular press briefing sa Malakanyang niadtong Lunes, gibutyag ni Lacierda nga makig-alayon sila kang government chief negotiator Marvic Leonen kun unsaon mapaabot sa gobyerno ang tabang.
“That’s something that we certainly would help. May mga nuances sa language so pag-uusapan pa ‘yun. Pero certainly it’s something that we would like to help,” matud pa ni Lacierda.
Nanghinaot usab si Lacierda nga ang susamang panig makamugna og desisyon sa annexes sa maong Framework Agreement.
Positibo usab ang Palasyo nga ang duha ka panig makakumpleto dayon sa annexes sa maong kasabotan. Usa ka comprehensive peace pact ang gitinguha sa gobyerno ug sa MILF sa dili pa matapos ang tuig. (PIA-Bohol/ecb/i-gg)
Ph-MILF, positibo sa exploratory talks
TAGBILARAN CITY, Bohol, Nov. 14 (PIA)–Misentro sa paghipno sa “annexes” sa hisgotan sa power ug wealth-sharing ug normalization ang nagpadayon nga exploratory talks tali sa gobyerno sa Pilipinas ug Moro Islamic Liberation Front (MILF) sa Kuala Lumpur, Malaysia.
Kahinumdoman nga unang milagda ang duha ka panig sa framework agreement nga maoy basehan sa planong pagtukod og bag-ong Bangsamoro entity sa Mindanao.
Kalabot niini, nipadayag usab og kumpiyansa si government chief negotiator Marvic Leonen nga daling magkasinabot ang gobyerno ug MILF ilabi na nga mi-ani kini og positibong reaksyon gikan sa nagkalain-laing sektor ang gisulod nga kasabotan.
“I am certain that both of us will try to find solutions in order to complete the Comprehensive Agreement, preferably in this round. All of us now are part of history, let us work together some more to make that history truly matter,” matud pa ni Leonen.
Sa panig sa MILF, nipahayag usab og pagsalig si negotiating panel chair Mohagher Iqbal sa trabaho karong gihimo sa nagka-daiyang mga technical working groups.
“The spirit of compromise is still very strong. I believe we can settle all the issues,” dugang pa sa opisyal. (PIA-Bohol/ecb/i-sjp)
