TAGBILARAN CITY, Bohol, June 26 (PIA)–Mas maayo nga isipon na lamang nga tabang sa gobyerno alang sa mga overseas Filipino worker (OFW) sa Europa ang pagpahulam sa nasud og $1 bilyon sa International Monetary Fund (IMF).
Reaksyon kini sa Malakanyang sa pahayag ni Senator Gringo Honasan nga dili transparent ang pagpahulam og $1 bilyon nga giingong mas maayong gigamit na lang sa poverty alleviation program sa gobyerno.
Matud pa ni Deputy Presidential Spokesperson Abigail Valte, gi-respeto nila ang pahayag sa senador apan kinahanglang masabtan sa mga nibatok sa lakang sa gobyerno nga tabang na usab kini sa Pilipinas sa mga nasud sa Europa kun mohinay ang ilang ekonomiya.
Pasabot pa ni Valte nga kun magkaproblema sa ekonomiya sa Europa, daghan usab maapektuhang mga Filipinong nagtrabaho didto.
Una nang miingon si Bangko Sentral ng Pilipinas (BSP) Deputy Governor Diwa Gunigundo nga dili pagpasigarbo sa gobyerno ang pagpahulam og $1 bilyon sa IMF.
Giingong naa sa charter sa BSP ang ilang gihimo ug gawas niini, ang halos $77 bilyong gross international reserve sa Pilipinas naka-invest usab sa US Treasury ug Japanese funds. (PIA-Bohol/ecb)
Bangladesh, adunay tanyag nga trabaho alang sa mga Pinoy nurses
TAGBILARAN CITY, Bohol, June 26 (PIA)–Gi-anunsyo sa Department of Foreign Affairs (DFA) nga nanginahanglan og daghang Filipino nurses ang usa sa mga nag-unang ospital sa Bangladesh.
Matud pa ni Ambassador Bahnarim Guinomla, aduna nay recruitment ug documentation sa mga requirement sa mga Pinoy medical worker sa maong nasud.
Gikan ang impormasyon sa mga ospiyal sa United Hospital nilang retired General Saidul Islam, director for operations and administration ug Dr. Salaidul Asmed, ang chief coordinator for development.
Nagsugod na usab ang interview sa mga aplikante sa dihang mibisita sa nasud si Asmed ning bag-o lang.
Gihulagway pa ni Guinomla ang pagkuha sa mga medical workers isip ground breaking development sa mas daghang Pinoy nurses.
Plano usab sa maong ospital nga ibutang ang mga madawat nga Pinoy nurses sa emergency ug intensive care cases o ang gitawag nga basic life support work.
Alang sa uban pang impormasyon, mahimong makig-alayon lang sa DFA. (PIA-Bohol/ecb)
Daghang trabaho buksan sa Canada ug Middle East
TAGBILARAN CITY, Bohol, June 26 (PIA)–Libuang trabaho ang gikinahanglan karon sa Middle East ug Canada alang sa mga Pinoy.
Sa five-year development plan pa lamang sa Saudi Arabia, libuang trabahador na ang kinahanglanon sa pagtukod og mga bag-ong syudad, pabalay, kadalanan ug mga tulay.
75,000 ka Pinoy usab ang gipaabot aron matukod ang taas nga tulay nga magsumpay sa Qatar ug Bahrain.
Sa usa ka radio interview, gibutyag ni Labor Secretary Rosalinda Baldoz nga in-demand pa usab ang mga nurses sa Canada ug Australia samtang kinahanglan usab didto ang mga skilled workers sama sa welder ug pipe fitters.
Bisan sa Malaysia, adunay five-year development plan na usab mao nga manginahanglan og mga construction workers, samtang 9,000 ka trabaho usab ang naghulat sa South Korea alang sa mga factory worker.
Apan nipasidaan ang kalihim nga kinahanglang siguradohon ngadto sa Philippine Overseas Employment Administration (POEA) nga lehitimo ang mga trabaho nga planong sudlan sa ubang nasud.
Angay siguradohon una nga adunay job order ang tanyag nga trabaho ug may accredited ug licensed agencies aron dili masayang ang salapi ug panahon.
Gitin-aw usab ni Baldoz nga walay placement fee nga angay bayaran kun mo-trabaho sa Canada ug Australia, samtang katumbas usab sa usa ka buwang sweldo ang placement fee sa mga OFW sa Middle East. (PIA-Bohol/ecb)
