TAGBILARAN CITY, Bohol, July 08 (PIA)–Positibo ang administrasyong Aquino nga makab-ot nila ang 10 milyong foreign tourist arrival sa Pilipinas paghidangat sa tuig 2016.
“It is a very ambitious target but we have put everything that we have in there to achieve those targets,” matud pa ni Deputy Presidential Spokesperson Abigail Valte.
Gibutyag ni Valte nga sa pagkakaron, nikabat na sa 2.1 milyon ang natalang nakasulod nga turista sa nasud bisan katunga pa lamang kita sa 2013.
Giingong gihimo na sa Department of Tourism (DOT) ang tanan alang sa awareness ug kampanya aron makadani og mga turista.
Nagtuo si Valte nga inanay nang nituo ang mga langyaw nga tinuod nga “It’s more fun in the Philippines” diin padayon ang pagdaghan sa mga langyaw nga mibisita sa nasud.
Giingong dakung tabang usab ang survey sa Travel + Leisure magazine diin nakuha sa Pilipinas ang number one ug two spot sa World Best Awards in 2013 sa dihang mapili ang Palawan ug Boracay sa best islands in the world.
Target sa DOT nga makab-ot ang 10 milyong turista pag-abot sa tuig 2016 aron magbaton og kakumpetensya ang Thailand ug Malaysia.
Ang Thailand gibisita og 22 ka milyong turista niadtong 2012 samtang 25 milyon usab ang nibisita sa Malaysia sa niaging tuig. (PIA-Bohol/ecb)