MANILA, Dec. 17 (PIA)–Uyon ang Malakanyang sa paggamit sa speed monitoring o limiting devices sa mga sakyanang pasaheroan sama sa mga bus aron malikayang mausab pa ang nahitabong disgrasya sa Skyway sa kaulohan niadtong Lunes sa buntag.
Matud pa ni Presidential Communications Operations Office Sec. Herminio Coloma, mahinongdanon ang monitoring device aron malikayan sa mga bus driver ang pagpadagan ug kusog.
“Puwede itong gamitin bilang monitoring o control device. Makabubuti ito sa may-ari ng bus. Pati ang pagsunod ng mga tsuper sa takdang tulin ay magiging daan din para makatipid ng gasolina ang minamaneho nilang sasakyan,” matud pa ni Coloma.
Giingong gitugyan na sa Palasyo sa mga magbabalaod ang paghimo og merito sa mga lakang alang niini ug ang pagpalig-on sa angay nga balaodnon.
Gihisgotan usab ni Coloma ang kalabot sa Seat Belt Law nga balaod na karon mao nga gipatuman na kini sa mga sakyanang pasaheroan.
Samtang, gibutyag usab sa kalihim nga gitugyan sa gobyerno sa pribadong sektor ang pagpanag-iya sa mga sakyanang pasaheroan.
Ang papel sa gobyerno dinhi alang lamang sa regulasyong adunay kalabot sa operasyong ginahimo sa pribadong sektor.
“Kung maaaring gampanan ng pribadong sektor ang paglilingkod, mas mainam na sila ang magsagawa nito nang salig sa mga tuntuning itinakda ng pamahalaan para naman pangalagaan at isulong ang kapakanang pambayan,” pasabot ni Coloma. (PIA7-Bohol/ECB)
