TAGBILARAN CITY, Bohol, April 02 (PIA)–Gipasabot sa Malakanyang nga walay diskriminasyon ang pag-veto ni Presidente Benigno “Noynoy” Aquino III sa balaodnon aron matangtang ang height requirement sa PNP, BFP ug BJMP.
Matud pa ni Deputy Presidential Spokesperson Abigail Valte, imbes nga makatabang, basin makadaot pa hinuon ang balaod sa mga hingtungdang ahensya.
Si Valte nagkanayon nga may pipila ka trabaho lamang nga kinahanglan ang physical attributes.
Giseguro usab ni Valte nga dili angay maguol ang mga mas mubo nga personnel nga nakasulod na tungod kay dili man sila tangtangon.
Giingong may waiver o exemption man sa kasamtangang balaod nga mahimong nilang gamiton.
“Hindi naman po siya discrimination. Kailangan lang din po doon sa nature ‘nung trabaho nila,” matud pa ni Valte.
Kahinomduman nga ang maong balaodnon mi-agi sa makuting pagdungog sa Kongreso ug nakalusot sa bicameral conference committee sa wala pa kini giduso kang PNoy. (PIA-Bohol/ecb/i-gg)
PH Embassy sa Portugal, nipasidaan batok sa employment scam
TAGBILARAN CITY, Bohol, April 02 (PIA)–Nipasidaan ang Embahada sa Pilipinas sa Lisbon, Portugal batok sa mga pekeng tanyag nga trabaho sa internet.
Matud pa sa embahada, nagkadaghan ang mga nagreklamong Pinoy nga giingong nabiktima sa online scams diin nakadawat sila og tanyag nga trabaho sa e-mail gikan sa mga law firm ug kumpanya sa Portugal.
Giingong nagtanyag kini og trabaho ug paspas nga pag-proseso aron makakuha og visa permits hulip sa fees nga ipadala pinaagi sa money transfer.
Apil sa modus operandi sa mga mangingilad ang paggamit sa mga impormasyon sa website sa mga inilang kumpanya apan alisdan ang contact information niini.
Maningil kini og bayad alang sa Entry-Clearance Certificates, International/Overseas Employment Certificates-(I/OEC) ug Affidavits of Guarantee Fund nga mga dili man apil sa requirements sa Portuguese authorities.
Alang sa mga gustong mo-adto o mo-trabaho sa Portugal, mahimong mosulat sa e-mail address sa Philippine Embassy sa Lisbon, Portugal nga filipinas.emb.lisbon@gmail.com.
Gitambagan ang mga Pinoy nga mag-amping ug magbantay sa mga gi-aplayang trabaho sa ubang nasud. (PIA-Bohol/ecb/p-gg)