TAGBILARAN CITY, Bohol, May 11 (PIA)–Gihimakak sa Malakanyang ang kahadlok nga mosaka ang presyo sa karneng baboy sumala sa nauna nang gipahayag sa Philippine Association of Meat Processors, Inc. (PAMPI) kun sundon sa gobyerno ang sugyot sa mga hog raisers nga limitahan ang pag-angkat sa mga karneng baboy sa nasud.
Matud pa ni Deputy Presidential Spokesperson Abigail Valte, giseguro sa Department of Agriculture nga igo ang gi-angkat nga karneng baboy mao nga walay angay kabalak-an nga mosaka ang presyo niini.
Dugang pa ni Valte, nakig-tambayayong na ang BOC sa mga hog raisers aron masulbad na ang problema sa technical smuggling.
Giingong gimandu na ni Commissioner Ruffy Biazon ang kinatibuk-ang revamp sa mga units sa Customs nga nagdumala sa meat pork ug poultry importation gawas pa ang pag-audit sa mga niaging importations ug ang verification sa existing pork importers. (PIA-Bohol/ecb)
Lumad nga pinulongan, gamitong lenggwahe sa pagtudlo sa kinder hangtud grade 3
TAGBILARAN CITY, Bohol, May 11 (PIA)–Sugod sa pagbukas sa klase karong Hunyo, ang mother tongue o lumad nga pinulongan na ang gamiton sa pagtudlo gikan kinder hangtud grade 3, gawas na lang sa subjects nga English ug Filipino.
Agi kini og pagsunod sa bag-ong curriculum sa K-12 program sa Department of Education (DepEd).
Apil sa 12 nga napiling dialects sa DepEd alang niining bag-ong sumbanan ang Tagalog, Kapampangan, Pangasinense, Iloko, Bikol, Cebuano, Hiligaynon, Waray, Tausug, Maguindanaoan, Maranao ug Chabacano.
Apan pag-abot sa grade 4 hangtud grade 12, English na ang gamiton sa kadaghanan sa mga subject.
Nagtuo ang DepEd nga pinaagi niini, mas mosaka ang kalidad sa edukasyon.
Giingong kaniadto, English ug Tagalog lang ang gigamit sa pagtudlo mao nga mas naglisod ang mga bata sa pagsabot. (PIA-Bohol/ecb)