MANILA, May 25 (PIA)–Gideklarar na sa Philippine Atmospheric Geophysical and Astronomical Services Administration (PAGASA) ang pagsulod sa panahon sa ting-ulan sa nasod.
Matud pa ni PAGASA Climate Monitoring and Prediction Section nga si Anthony Lucero, ang sunod-sunod nga nasinating pagbubo sa ulan sa pipila ka parte sa nasod epekto sa climate system.
Tungod niini, makasinati ang nasod og madag-omon nga kalangitan ug katag-katag nga pag-ulan matag hapon.
Gipahinumdoman na usab sa weather bureau nga mag-andam na ang publiko sa daghang pag-ulan ilabi na nga gipaabot ang pagsulod sa La Niña sa ikaduhang kwarter sa 2016.
Matud pa sa PAGASA nga gipaabot nila ang pagsulod sa bagyo sa nasod sa dili pa matapos ang buwan sa Mayo ug usa pa sa buwan sa Hunyo.
Gipaabot nga 7 hangtud 17 ka bagyo ang moabot sa nasod hangtud sa buwan sa Oktubre.
Nunot niini, nipasidaan ang PAGASA sa mas kusog nga mga bagyong moabot sa katapusang kwarter ning tuig. (ecb/PIA7-Bohol)