TAGBILARAN CITY, Bohol, Nov. 12 (PIA)–Tungod sa init nga isyu sa balota alang sa 2013 elections, gi-angkon sa Commission on Elections (Comelec) nga apil na sa ilang plano ang paperless elections sa umaabot pang piniliay.
Sa pangutana ni Senator Ping Lacson kun posible ba ang paperless elections sa mga umaabot pang piniliay, miingon si Comelec Chairman Sixto Brillantes nga gitun-an na nila kini karon.
Giingong gitugotan man kini sa balaod, apan katoluon hangtud kaupaton nga mas mahal ang direct-recording electronic (DRE) machines kun itandi sa gigamit nga optical mark reader (OMR) sama sa precinct count optical scan (PCOS) machines.
Sa pagduso usab sa paperless elections, miingon si Brillantes nga angay magbaton og tulo hangtud upat ka makina matag presinto.
Giingong lisud usab kun walay balota sa eleksyon tungod kay wala nay paper trail o ebidensya kun adunay mo-akusar og pagpanikas. (PIA-Bohol/ecb/I-hd)
Palasyo, dismayado sa pagbakwi sa SC sa live coverage sa Maguindanao massacre trial
TAGBILARAN CITY, Bohol, Nov. 12 (PIA)–Dismayado ang Malakanyang sa pagbakwi sa Supreme Court (SC) sa nahiunang desisyon niini nga nagtugot sa live media coverage sa pagdungog sa Maguindanao massacre.
Matud pa ni Presidential Spokesperson Edwin Lacierda, daan nang pabor si Presidente Benigno “Noynoy” Aquino sa live media coverage sa Maguindanao massacre case aron paspas ang paglihok sa kaso.
Mao nga giingong mahimong hagit sa hudikatura kun unsaon mapadali ang kaso karong gi-bawal na ang media coverage.
Una nang gi-paboran sa SC ang motion for reconsideration (MR) ni Andal Ampatuan Jr. nga nag-ingong matamakan sa public trial ang ilang katungod sa patas nga pagpanalipud ug presumption of innocence.
Gipasabot sa SC nga bisan gi-ila ug gi-respeto nila ang press freedom, kinahanglan usab nilang ilhon ang katungod sa akusado nga direktang maapektuhan sa pagdungog sa kaso.
Parte sa ruling sa SC, “While this court recognizes the freedom of the press and the right to public information, which by the way are rights that belong to non-direct parties to the case, the rights of the direct parties should not be forgotten.” (
“In a clash among these competing interests and in terms of the values the constitution recognizes, jurisprudence makes it clear that the balance should always be weighed in favor of the accused,” matud pa sa desisyon. (PIA-Bohol/ecb/I-hd)