TAGBILARAN CITY, August 17 (PIA)–Ang Constitutional Reformers to Federalism nga gipangunahan ni Atty. Raul Lambino, ang lead convenor sa PDU30-CoRe kaabag ang Kagamhanang Probinsiyal sa Bohol ug Department of Interior and Local Government (DILG), nipahigayon og forum kalabot sa pederalismo dinhi sa lalawigan sa Bohol kagahapong adlawa.
Gitambongan kini sa mga mayor, bise mayor, board members, ABC presidents, kawani sa nasudnong kagamhanan, business sector, NGOs/CSOs, academe, youth sector leaders, media ug religious sector.
Tumong sa maong forum ang pagpahibalo ug edukar sa mga Bol-anon kalabot sa pederalismo.
Ang maong forum maoy nisugod sa information campaign alang sa matang nga pederalismo nga pangagamhanan dinhi sa Pilipinas gikan sa karon nga unitary government nga gipaningkamotan nga maumol sa katapusang tulo ka tuig sa administrasyon ni Presidente Rodrigo Duterte.
Si Lambino mipasabot nga kining proseso dili sayon tungod kay dili lalim nga kini paga-umolon sa mga lungsod, lalawigan, ug ang pagmugna sa bag-ong mga estado ubos sa pederalismo.
Matud pa nga ilang himuon kutob sa tanan nilang mahimo atol sa administrasyon ni Duterte ang pagbalhin sa kasamtangang kagamhanan ngadto sa pederalismo nga adunay dakong gahom nga ihatag sa mga local government units.
Si Dennis Ancheta, usa ka professor sa history nagkanayon nga ang nasod sa Belgium maoy labing maayong modelo sa pederalismo alang sa Pilipinas diin matud pa nga ang maayong lider makahimo ug dakong kalamposan apan dili usab makamugna og dakong kadaot ang dautang pangulo.
Ang kagamhanang pederalismo magalakip na sa mga estado nga makahimo sa hukom nga wala kaayo’y pwersa gikan sa nasodnong kagamhanan.
Kauban usab nilang Lambino ug Ancheta nga nipasabot kabahin sa pederalismo ang ubang PDU30-CORE team nga sila Atty. Emmanuel Tumanda ug Atty. Mike Planas. (ecb/PIA7-Bohol)