TAGBILARAN CITY, Sept. 27–Gimanduan sa pamunuan sa Social Security System (SSS) ang 400 pensioners sa nagsira nga LBC Development Bank sa pagbukas na og bag-ong accounts aron malikayan ang kalangan sa pagdawat sa ilang binuwang benepisyo.
Matud pa kang SSS President ug Chief Executive Officer Emilio de Quiros Jr., ang October pensions nga adunay accounts sa LBC Development Bank pagabayaran og pension checks nga ipadala sa ilang mga panimalay hangtud wala pa sila’y bag-ong accounts sa laing bangko.
Ang LBC Development Bank gipasira sa Bangko Sentral ng Pilipinas tungod sa pagsupak sa pipila ka banking laws apil na ang giingong bilyong pondo niini sa affiliate companies.
Mikabat sa 99 percent o may 6 milyon pensioners ang nagdawat og pension pinaagi sa ilang passbook o ATM savings accounts samtang ang 18,000 gibayaran og pension checks via mail.
Dinhi sa lalawigan sa Bohol, gibutyag sa SSS Branch Head nga si Mariano Talicpic nga walay problema sa pagdawat sa mga pensioners tungod kay wala may LBC Bank dinhi. (PIA-Bohol/ecb)