Taliwa sa mga panawagan batok sa gihanyag nga Reproductive Health ug Population Development nga balaudnon sa Kongreso, si President Gloria Macapagal-Arroyo mipatin-aw sa iyang baroganan sa maong isyu sa iyang State of the Nation Address kon SONA niadtong Hulyo 28.
Sa iyang SONA, gipasabot sa Presidente nga ang kampanya sa natural nga pamaagi sa pagplano sa banay mas epektibo kon itandi sa ‘artipisyal nga pamaagi’, kay mikunhod man og 2.04% ang pagsaka sa populasyon kon itandi sa 2.36% sa dihang gipakadak-an pa ang artipisyal nga pamaagi niadtong mga tuig 1990. (“By promoting natural planning and female education, we have curbed population growth to 2.04% during our administration, down from the 2.36 in the 1990’s, when artificial birth control was pushed,” said President Arroyo.)
Sa panglantaw nga ang kadaghanun sa katawhan adunay epekto sa pag-ugmad sa nasud, giduso ni Presidente Arroyo ang tulubagon ug responsibilidad sa mga ginikanan sa ilang banay, ug kinahanglan ang adunay lapad nga kampanya kabahin sa “responsible parenthood.”
“Therefore informed choice should mean letting more couples, who are mostly Catholics, know about natural family planning,” dugang sa Presidente.
Ang baroganan sa Presidente nahaum sa gihimong Prayer Rally niadtong Hulyo 30 didto sa katedral de San Jose sa Tagbilaran.
Ang kalihukan gitambungan sa kapin sa 15,000 ka mga estudyante ug magtutudlo sa mga nagkalainlaing tulunghaan sa Tagbialran, mga sakop sa nagkalainlaing kapunungan sa simbahan, mga opisyales sa kagamhan, ug uban pa; nga mi-protesta batok sa maong balaudnon sa kamara.
Ila usab nga gipanawagan ang tulo ka mga kongresista sa lalawigan sa Bohol sa dili pagpirme ug uyon sa maong balaudnon, ug mobarog isip mga pro-life nga magbabalaud.
Ang kalihukan gisugdan sa martsa gikan sa lima ka mga nagkalainlaing lugar sa dakbayan padulong sa Katedral diin adunay gihimong ‘prayer rally’.
Gitapos ang maong kalihukan sa usa ka Santos nga Misa nga gipangunahan ni Obispo Leonardo Medroso, uban sa mga kaparian ug relihiyoso sa Dioseses sa Tagbilaran. (PIA/Bohol)
