TAGBILARAN CITY, Bohol, Dec. 12 (PIA)–Makusganong gikondenar sa gobyerno ang pagpalupad og rocket sa North Korea ganinang buntag.
Sa opisyal nga pahayag sa Department of Foreign Affairs (DFA), giingong nisupak ang Democratic People’s Republic of Korea (DPRK) sa United Nations Security Council (UNSC) Resolutions 1695 (2006), 1874 (2009) ug 1718 (2006) nga nagdili sa paggamit o pagpalupad og bisan unsang matang sa ballistic missile technology.
Kalabot niini, gi-aghat sa gobyerno ang NoKor nga undangon na ang paggamit sa maong teknolohiya ug makig-hiusa sa international community sa pagduso sa kalinaw ug kahapsay sa Asya.
“The Philippines firmly urges the DPRK to desist from acts of provocation and to end its use or testing of ballistic missile technology.”
“The Philippines joins other governments in urging the DPRK to undertake steps towards confidence-building and engagement with the international community in order to ensure peace and stability in the Korean Peninsula and the entire Asia Pacific region.”
Una nang nagpalupad og rocket ang North Korea ganinang alas-8:49 sa buntag aron kuno maka-pwesto sa scientific satellite sa kawanangan.
Giingong mihagsa ang debris niini sa gilay-ong 300 kilometers (km) sa sidlakang bahin sa Pilipinas. (PIA-Bohol/ecb/I-sjp)
