TAGBILARAN CITY, Bohol, May 31 (PIA)–Nitala og 6.4 percent nga paglambo ang ekonomiya sa nasud sa unang quarter ning tuig.
Base sa datus nga gipagwas sa gobyerno, ang paglambo sa gross domestic product (GDP) tungod sa paglambo usab sa manufacturing sector ug net exports. Una nang gitakda sa gobyerno ang 5 hangtud 6 percent nga economic growth karong tuiga.
Sa unang pagtaya sa Moody’s Corporation’s economic and consumer credit analysis, gibanabana lamang nga magduwa sa 4.8 percent ang mahimong paglambo sa tibuok ekonomiya sa nasud sa tuig 2012.
“Assuming global demand gathers steam over 2012, helping lift exports and private consumption, higher government spending adds upside risk to our four percent 2012 growth forecast,” matud pa sa taho sa Moody’s.
Sa niaging tuig, ang domestic economy nitala lamang og 3.7 percent growth. (PIA-Bohol/ecb)
JBC, magpulong sa Lunes alang sa nominasyon sa bag-ong CJ
TAGBILARAN CITY, Bohol, May 31 (PIA)–Magpulong na sa Lunes, Hunyo 4 ang Judicial and Bar Council (JBC) alang sa himuong pagdawat sa nominasyon sa mahimong mosunod nga chief justice.
Matud pa ni JBC member nga si Atty. Milagros Fernan-Cayosa, tungod kini sa pagdeklarar sa Korte Suprema kagahapon nga bakante na ang posisyon sa punong mahistrado human ma-impeach si Chief Justice Renato Corona.
Adunay 90 ka adlaw si Presidente Benigno “Noynoy” Aquino III aron magbutang og bag-ong punong mahistrado apan target nilang maka-sumite og listahan sa mga nominado sulod sa 45 ka adlaw.
Gibutyag ni Cayosa nga base sa Batakang Balaod, adunay tulo ka minimum requirement aron ma-nominate o irekomendar sa posisyon. Angay natural born Filipino citizen, 40 anyos pataas ug adunay 15 ka tuig nga kasinatian sa pagserbisyo isip hukom o pag-practice sa balaod.
Apan tungod kay chief justice man ang gihisgotan, mas maayo kun mas taas pa ang kwalipikasyon.
Gipasabot usab ni Cayosa nga dili kinahanglang gikan sa sulod o sa Korte Suprema ang mosunod nga punong mahistrado.
Giingong dili usab limitado sa nominasyon o rekomendasyon apan mahimong mo-apply ang usa ka interesadong indibidwal kun sa iyang tan-aw kwalipikado siya sa posisyon. (PIA-Bohol/ecb)
Bohol, nagpabiling luwas alang sa mga katawhan ug patigayon;
pagbutang og CCTV camera sa mga munisipyo, giduso sa PPOC
TAGBILARAN CITY, Bohol, May 31 (PIA)–Gibutyag ni PNP-Bohol Provincial Director PSSupt. Constantino Barot, Jr. atol sa tigom sa mga sakop sa Provincial Peace and Order Council (PPOC) kagahapon didto sa Governor’s Mansion nga ang bulan sa Marso ning tuig nitala ug taas nga crime volume apan nikunhod sa bulan sa Abril.
Nagpabiling nag-una sa mga nahitabong krimen sa Bohol ang pagpangawat ug gisundan kini sa tulis.
Apan bisan pa niini, gi-deklarar sa PNP-Bohol nga luwas gihapon alang sa mga katawhan ug mga patigayon ang lalawigan
Sa iyang bahin, gipahayag ni 802nd Brigade Commander Col. John Bonafos nga nagpabiling anaa sa lalawigan ang Bohol While Area Committee kun komitibang rehiyon sa Central Visyas taliwala sa ilang pagkapakyas sa pag-andam sa lakang alang sa laraw nga pagsulod og balik sa bukirang bahin sa Bohol sa mga armadong grupo.
Samtang giduso sa PPOC ang pagbutang og mga CCTV camera sa mga munisipyo ug mga patigayon isip usa sa mga pamaagi pagpakgang sa mga dautang laraw sa mga kriminal.
Kini agig tubag sa mga nahitabong pagpanglungkab sa mga buhatan sa mga mamahandi sa pipila ka munisipyo dinhi sa lalawigan sama sa nahitabo sa mga lungsod sa Balilihan, Bilar ug Catigbian ning bag-o lang. (PIA-Bohol/ecb)
Bohol, nanginahanglan og dugang 23 ka Provincial Prosecutors
TAGBILARAN CITY, Bohol, May 31 (PIA)–Gibutyag ni Provincial Prosecutor Macario Delosa atol sa Provincial Peace and Order Council (PPOC) meeting nga gipahigayon kagahapon didto sa Governor’s Mansion ang kakulang og dugang 23 ka mga Provincial Prosecutors sa lalawigan sa Bohol aron maatiman ang mga reklamo gikan sa katawhan nga gitaral sa mga hukmanan sa lalawigan ug dakbaya.
Sa 23 ka mga prosecutor nga gikinahanglan alang sa lalawigan sa Bohol, 14 niini ang alang sa probinsya ug 9 usab ang gikinahanglan sa dakbayan.
Gibutyag usab ni Delosa nga sa 23 ka mga prosecutors nga gikinahanglan, 3 pa lamang ang ni apply sa maong posisyon pinaagi sa pagsomitir sa ilang mga papeles diha sa ilang buhatan sa Provincial Prosecutor’s Office.
Giduso na usab ang maong mga aplikasyon ngadto sa ilang labaw nga buhatan sa Hudikatura alang sa evaluation ug pag-aprobar ni Presidente Aquino.
Naglaum si Delosa nga molihok na ang mga natanggong nga mga aplikasyon sa mga prosecutors human natapos na usab ang impeachment trial sa punong mahistrado nga si Renato Corona. (PIA-Bohol/ecb)