MANILA, Dec. 29 (PIA)–Sa labing unang higayon sukad niadtong 2007, wala na karon ang Pilipinas sa listahan sa “World’s Most Deadly Countries for Journalists”.
Matud pa sa Committee to Protect Journalists (CPJ), usa ka press freedom watchdog nga naka-base sa New York, base sa ilang year-end analysis wala sila’y nadokumentong kaso sa pagpatay sa usa ka mamamahayag nga adunay direktang kalabotan sa trabaho niini.
Bisan adunay giingong 7 ka mamamahayag nga gipatay, apan dili pa klaro kun work-related o may kalabotan sa trabaho kini o kun unsa ang motibo sa krimen tungod kay nagpadayon pa ang imbestigasyon niini.
Kahinumdoman nga pipila ka higayon nga nabutang ang Pilipinas sa talaan sa “World’s Most Dangerous Countries for Journalists” kauban ang Syria ug Iraq.
Ang pinaka-grabeng nahitabong pagpatay sa mga mamamahayag dinhi sa nasud mao ang Maguindanao Massacre niadtong 2009 diin kapin 30 ka mamamahayag ang namatay. (ecb/PIA7-Bohol)