TAGBILARAN CITY, Bohol, July 09 (PIA)–Gi-alerto sa Department of Health (DOH) ang Bureau of Quarantine batok sa giingong bag-ong sakit nga ‘Cambodia respiratory disease’ nga maoy hinungdan sa kamatayon sa kadaghanan sa mga bata sa maong nasud.
Matud pa ni Health Secretary Enrique T. Ona, gitahasan na niya ang Bureau of Quarantine nga ipatuman ang hingpit nga pagsusi ug pag-amping sa pagpahigayon og screening procedures sa tanang mosulod sa mga international airports.
Apan gitataw ni Ona nga walay gidid-an sa mga moadto ug maggikan sa Cambodia.
Giingong sa pagkakaron, kasamtangang gi-monitor sa DOH pinaagi sa National Epidemiology Center ang sitwasyon human mipahibalo ang World Health Organization (WHO) sa nasud kalabot sa maong sakit human nga natala sa Cambodia ang pagkamatay sa 60 ka bata nga pito ang panuigon paubos.
Migawas nga 74 ka pasyente gikan sa Kingdom of Cambodia ang nakiitaan og trangkaso gikan Abril hangtud Hunyo.
Mikabat usab sa 56 pasyente ang namatay sukad sa 57 nga gidala sa ospital sa Phnom Penh samtang upat usab ang namatay sa Siem Reap.
Giingong kasagaran nangamatay sulod lamang sa 24 oras ang maong mga pasyente nga paspas ang komplikasyon sa pagginhawa.
Tungod niini, gi-aghat pa gihapon ni Ona ang publiko nga magpabilin sa kahinlo sa lawas ug kanunay nga paghugas sa mga kamot. (PIA-Bohol/ecb)
Senior citizens, may discount ug VAT exemption
sa mga medical equipments and services
TAGBILARAN CITY, Bohol, July 09 (PIA)–Sugod karon adlawa, Hulyo 9, epektibo na ang administrative order sa Department of Health (DOH) nga maghatag og 20% diskwento ug value added tax (VAT) exemption sa mga senior citizen nga mopalit og mga medical equipments ug manginahanglan og medical services.
Matud pa sa DOH focal person on health and well being of older person nga si Jing Guerrero, apil sa mga adunay discount ug VAT exemption ang mga medical device sama sa wheel chair, bedpan, body support, fracture sack, oxygen ug uban pa.
May discount ug VAT exemption usab ang mga senior citizen sa mga medical services sama sa x-ray, blood test, computerized tomography scans ug uban pa apil na ang professional fee sa mga doktor ug dentista.
Gipasabot ni Guerrero nga gawas pa kini sa deduction nga makuha sa mga senior citizen sa PhilHealth mao nga mas mapaubos pa ang galastohan sa mga senior citizen sa hospital ug medical services. (PIA-Bohol/ecb)
