TAGBILARAN CITY, Bohol, June 25 (PIA)–Luwas na ang Pilipinas sa pag-blacklist ug posibleng pagsilot sa Financial Action Task Force (FATF) human misaka pa ang level sa nasud gikan sa delikadong “dark gray”, kauban sa karon sa “gray list”.
Matud pa ni Deputy Presidential Spokesperson Abigail Valte nga gi-ila sa FATF ang gihimo sa Pilipinas nga mga reporma aron motabang sa pagbatok sa anti-money laundering.
Gibutyag usab ni Valte nga gitaho sa Anti Money Laundering Council (AMLC) nga gihatagan og pagtagad sa FATF ang mga lakang sa gobyerno sa Pilipinas aron iduso ang transparency ug accountability sa mga pampinansyal nga transaksyon.
Giingong misuwat si Bangko Sentral ng Pilipinas (BSP) Governor Amando M. Tetangco Jr., nga mao usab ang tinugyanan sa AMLC, kang Presidente Benigno “Noynoy” Aquino III nga gi-ila sa FATF ang mga repormang gilusad sa gobyerno sa Pilipinas.
Ang pagkasulod sa nasud sa “gray list” gikan sa kanhi “dark gray list” nagpasabot nga adunay progreso sa action plan sa gobyerno.
Daku usab ang natabang sa pagkahimong balaod sa duha ka balaodnon ang “An Act to Further Strengthen the Anti-Money Laundering Law” ug “The Terrorism Financing Prevention and Suppression Act of 2012.” (PIA-Bohol/ecb)
Expiry dates sa mga gift certificates, gitangtang na sa DTI
TAGBILARAN CITY, Bohol, June 25 (PIA)–Sugod sa Hulyo 1, wala nay expiry dates ang mga gift check, gift cards o gift certificates (GC).
Matud pa ni Department of Trade and Industry (DTI) Undersecretary Zenaida Maglaya, agi kini og pagsunod sa DTI Administrative Order No. 10-40, nga gilagdaan niadtong Hunyo 25, 2010, diin nakalatid nga epektibo Hulyo 1, 2012, tanan nga i-isyung mga GC wala nay expiry date.
“Kapag ang gift check na hawak-hawak n’yo ngayon ay expiring before July 1, gamitin nyo na po. Ngayon, kung ang expiry date ay lalagpas sa July 1 at gusto nyo pong palitan para ma-extend o magkaroon ng expiry date ay puwede nilang iprisinta sa supplier para palitan at alisin ang expiry date,” matud pa ni Maglaya.
Gibutyag usab ni Maglaya nga aduna usab mga exempted niining kamanduan ilabi na kun naapil sa promo ang usa ka GC.
Ang mga exemptions niini nag-apil sa mga gift checks, vouchers, cards o certificate nga nakakonekta sa usa ka promo. Tungod kay kun promo, aduna kini gitakda kun kanus-a taman ang usa ka promo o aduna kini promo period.
Apil usab ang mga GC nga gi-isyu sa empleyado isip usa ka reward sa usa ka empleyado o alang sa loyalty, exempted usab kini. (PIA-Bohol/ecb)
