Pinoy health workers, ipaubos og pagbansay sa pag-atiman og Ebola cases
MANILA, Oct. 20 (PIA)–Ipaubos sa specialized training program sa Department of Health (DOH) sa pakigtambayayong sa World Health Organization (WHO) ang mga health workers isip pagpangandam sa pag-atiman sa mga pasyenteng adunay Ebola.
Matud pa sa tigpamaba sa DoH nga si Dr. Lyndon Lee Suy, ipahigayon ang pagbansay matag semana sugod sa Oktubre 28 isip parte sa gihingosgang kampanya batok sa Ebola.
Ang maong pagbansay maghatag og mas lalom nga kahibalo kalabot sa Ebola, kun unsaon kini pagpasa ug kun unsaon paglikay sa maong sakit. Parte sa pagbansay nga nakabase sa standard sa WHO ang practical exercises, theoretical learning, pre ug post-training examinations, clinical guidelines for treatment, principles of outbreak control and response ug logistics support.
Maggikan ang mga mosalmot sa DOH referral hospitals, pribado ug lokal nga hospitals apil na ang local government units (LGU) ug sila ang mahimong Ebola first responders.
Samtang gipaabot na ang pag-abot sa nasud sa mga infectious control experts gikan sa WHO nga maoy mobansay sa mga health workers. (ecb/PIA7-Bohol)
