BOHOL, Mar. 03 (PIA)–Gipangunahan ni Presidente Benigno ‘Noynoy’ Aquino III ang seremonya sa time capsule-laying alang sa pagtukod sa P 7.14 bilyong Panglao International Airport sa Barangay Lourdes sa lungsod sa Panglao, ning lalawigan.
Gipaabot nga matapos ang konstraksyon niini sa Disyembre 2017.
Ang Chiyoda-Mitsubishi Joint Venture (CMJV) ang Contractor sa maong proyekto nga gisugdan niadtong Hunyo 2015 sa pakigtambayayong sa Japan International Cooperation Agency (JICA) isip funding agency.
Sa diskurso sa Presidente, subli niining gitumbok sa mga Bol-anon nga angay walay mahabilin sa paglambo sa nasod.
Matud pa nga usa ang lalawigan sa Bohol nga gitutokan sa iyang administrasyon paghuman sa linog nga nitay-og sa lalawigan niadtong 2013.
“Sa pag-ikot natin sa bansa, tinutukoy natin ang mga pangangailangan ng komunidad, at agad itong tinutugunan. Isa po ang Bohol sa mga tinutukan natin matapos yanigin ng malakas na lindol ang inyong probinsya,” matud pa sa pahayag ni PNoy.
Ang Presidente nagkanayon nga ang maong bag-ong airport gipaabot nga mo-alagad sa 1.7 milyong turista matag tuig.
Giingong triplehon ang gidaghanon gikan sa kapin 500,000 ka turista matag tuig nga modagsa sa Tagbilaran Airport nga mas gamay ug limitado lamang ang nakapahimos.
Gitumbok sa Presidente nga mahinungdanon nga mahatagan og pagtagad ang turismo sa Bohol tungod kay kini man ang gipanginabuhian sa kadaghanan sa maong lugar.
Gipasabot ni PNoy nga matag turista nga mobisita, makamugna kini og trabaho o pagkakitaan sa mga Bol-anon.
Matud pa usab sa Presidente nga ang Panglao Airport usa sa major infrastructure projects sa Bohol.
Gikan tuig 2011 taman 2016, gibutyag ni PNoy nga ang gobyerno nigahin og P10.45 bilyon sa Bohol. Kining kantidad gigasto sa konstraksyon sa kadalanan, tulay, school buildings, health facilities ug flood control projects. (ecb/PIA7-Bohol)