TAGBILARAN CITY, Bohol, Feb. 27 (PIA)–Gipasalig sa Malakanyang nga walay angay ikahadlok ang gatusan ka mga Pinoy nga nagpuyo sa Sabah, Malaysia human sa standoff tali sa mga tagasuporta ni Sultan Jamalul Kiram III ug Malaysian authorities.
Matud pa sa Department of Foreign Affairs (DFA), gipasiguro ni Presidente Benigno “Noynoy” Aquino III ang kaluwasan sa mga Pinoy didto.
Gawas sa kaluwasan sa mga tagasuporta sa Pamilya Kiram, giingong angay dili kalimtan ang mga Pinoy nga dugay nang nagpuyo didto.
Niadtong Lunes, mibisita didto si DFA Usec. Jose Brillantes aron makiag-alayon sa kagamhanan sa Malaysia alang sa malinawon nga resolusyon sa isyu.
Tua na usab didto ang humanitarian ship nga magamit sa mga residente.
Ni-take over na kagahapon ang National Security Council sa Malaysia aron masulbad ang standoff sa Sabah.
Kini nagpasabot nga dili na basta mga polis ang mogunit sa pakig-negosasyon sa grupo ni Rajah Mudah Agbimuddin Kiram apan mismong gobyerno na sa Malaysia. (PIA-Bohol/ecb/i-sjp)
Legalidad sa kontrata tali sa Comelec ug Smartmatic, gipalig-on sa SC
TAGBILARAN CITY, Bohol, Feb. 27 (PIA)–Gipalig-on sa Korte Suprema ang kontrata tali sa Commisison on Elections (Comelec) ug Smartmatic-TIM nga maoy mo-supply og compact flash (CF) cards nga gamiton sa May 2013 midterm elections.
Kini human gibasura sa Korte Suprema ang petisyon sa diskwalipikadong CF card bidder nga LDLA Marketing.
Pasabot sa SC Public Information Office, ubos sa Republic Act (RA) No. 9184 (Government Procurement Act) and its Implementing Rules and Regulations (IRR) angay unta niduso una og motion for reconsideration ang LDLA sa Bids and Awards Committee ug protesta sa Head of the Procuring Entity (HOPE) kun mabasura ang mosyon.
Human niini, diha lang mahimong modulog sa korte ang bidder. (PIA-Bohol/ecb/i-gg)
