TAGBILARAN CITY, Bohol, Jan. 28 (PIA)–NIABOT na si Presidente Benigno “Noynoy” Aquino III gikan sa gipahigayon nga World Economic Forum sa Davos, Switzerland.
Sakay sa Philippine Airlines flight 001, miabot ang Presidente sa Ninoy Aquino International Airport (NAIA) mga alas-2:30 kagahapon sa hapon nga gisundan og press conference.
Sa iyang arrival statement, gipasigarbo ni PNoy ang pagsaka sa imahe sa nasud sa international community.
“Katangi-tanging pagkakataon po ito upang ipaliwanag sa kanila ang ating mga mabubuting adbokasiya at patunayang ibang-iba na ang Pilipinas kumpara sa ating dinatnan.”
Giingong apil sa iyang gikahinabi ang founder sa WEF nga si Klaus Schwab nga midayeg sa mga programang gihikyad sa iyang administrasyon.
Agig pagmatuod nga misaka ang kumpiyansa sa kanhi ‘Sick Man of Asia’ ang pagpahigayon sa WEF-East Asia sa Pilipinas sa 2014.
Giingong nakig-pulong usab kang PNoy si International Monetary Fund (IMF) Managing Director Christine Lagarde aron makisayod sa mga bag-ong patakarang ipatuman sa nasud.
Nagpakita’g balik og interes ug giingong gidayeg pa sa mga kumpanya gikan sa nagkalain-laing nasud ang malungtarong istratehiya sa pamuhunan sa nasud.
“Ibang-iba na nga po ang Piilipinas. At ngayon po, nakikita na ng pinapatunayan natin sa buong mundo, hindi tayo mabibigo, handa tayong humarap sa anumang hamon, taas noo po nating isusulong ang ating mga sarili sa landas ng pagbabago,” pagpasigarbo sa Presidente.
Samtang gibutyag usab ni PNoy ang pagdawat niya sa usa ka tseke gikan sa Filipino community sa Switzerland nga giingong ikaduhang parte sa tabang nga gipaabot niini sa mga naapektuhan sa Bagyong Pablo. Butang nga gidayeg sa Presidente.
Gisugat si PNoy ni Bise Presidente Jejomar Binay ug halos tanang miyembro sa iyang gabinete sama nilang National Defense Secretary Voltaire Gazmin, Justice Secretary Leila de Lima, Tourism Secretary Ramon Jimenez, Labor Secretary Rosalinda Baldoz, Public Works Secretary Rogelio Singson, Social Work Secretary Dinky Soliman, AFP chief of staff General Emmanuel Bautista ug airport General Manager Jose Angel Honrado.. (PIA-Bohol/ecb/i-ed)
