TAGBILARAN CITY, Bohol, Aug. 23 (PIA)–Kumbinsido na si Presidente Benigno ‘Noynoy’ Aquino III nga panahon na aron ibasura ang pagpanghatag og Priority Development Assistance Fund (PDAF) o pork barrel.
“Kailangan pa ng mas malaking pagbabago upang labanan ang mga talagang pursigidong abusuhin ang sistema. Panahon na po upang i-abolish ang PDAF,” matud pa ni PNoy.
Apan gitin-aw sa Presidente nga dili dautan ang PDAF, giingong migawas lamang nga may mi-abusar sa sistema.
Mao nga gipahayag sa Presidente nga duha ang misyon karon sa administrasyon—patubagon ang mga mi-abuso niini ug mangita og paagi aron masiguro nga makaabot sa mga Pinoy ang kaban niini.
Gitin-aw usab sa Presidente nga dili tanang pondo tangtangon. Giingong kinahanglang susihon ug tun-an kini og maayo.
Gitataw pa sa Presidente nga bawal na ang congressional insertions ug ang pagbutang sa pondo bisan asa lang ug giingong detalyado kining i-dokumento.
Giingong i–upload usab kini sa website sa DBM samtang ang mga bid notices ug awards adto sa Philippine Government Electronic Procurement System o PhilGEPS.
Gawas niini, nihikyad pa ang Presidente og mekanismo aron malikayan ang mga binuang.
Usa na niini nga kinahanglang maggikan sa usa ka limitadong menu ang mga proyektong pagapondohan.
Bawal na ang mga consumable nga soft project sama sa fertilizers, seedlings, tambal, medical kits, pustiso, pa-liga, training materials, ug uban pang mga butang nga dili masusi kun tinuod ba gayud.
Bawal na usab ang mga dinaliang imprastruktura sama sa dredging, desilting, regravelling o asphalt overlay project ug uban pa.
Gipasalig sa Presidente nga matumbok ra ang mga nagpaluyo sa kontrobersya pinaagi sa gitukod niyang special panel nga mo-imbestigar niini o ang Inter-Agency Anti-Graft Coordinating Council (IAAGCC). (PIA-Bohol/ecb)