TAGBILARAN CITY, Bohol, Aug. 16 (PIA)–Gitataw karon sa Malacañang nga adunay gipangita nga “criteria” si Presidente Benigno “Noynoy” Aquino III sa pagpili sa mosunod nga chief justice sa Korte Suprema..
Sa usa ka pahayag, miingon si Budget Sec. Florencio “Butch” Abad nga nag-unang gipangita sa punong ehekutibo ang usa ka opisyal nga kamao mopatuman sa gidusong judicial reform sa iyang administrasyon.
“He will be looking for a prospective Chief Justice who has integrity, competence, political will and commitment to pursue and put into effect these reforms,” matud pa ni Abad sa usa ka mensahe.
Una nang gikumpirmar ni Deputy Presidential Spokesperson Abigail Valte nga naa na ni Presidente Auino ang listahan sa pagapilian alang sa bag-ong chief justice.
Matud pa ni Valte nga mopili ang Presidente sa dili pa ang deadline niini sa Agosto 27.
Dugang pa ni Valte nga paaboton na lamang kun kinsa ang mahimong choice sa Presidente aron mamuno sa Korte Suprema. (PIA-Bohol/ecb)
COMELEC, DBM, nagka-uyon na sa P8.4-B election fund
TAGBILARAN CITY, Bohol, Aug. 16 (PIA)–Nagka-uyon na ang Commission on Elections (Comelec) ug Deparment of Budget and Management (DBM) sa planong pondo alang sa himuong piniliay sa sunod tuig.
Sa budget deliberations sa Senado nga gipamonuan ni Senate finance committee chairman Sen. Franklin Drilon, miingon si Brillantes nga gidawat na nila ang P8.4 billion budget sa Comelec alang sa 2013 elections.
Giingong nagpulong ang DBM ug Comelec sukad niadtong Hulyo diin nagka-uyon sila nga kuhaon na lamang sa 2012 Comelec savings ang galastohan alang sa preparatory activities sa 2013 elections.
Tungod niini, miingon si Brillantes nga igo na ang P8.416 billion alang sa fully automated elections sa sunod tuig.
Kalabot niini, gipasabot ug nangayo og pasaylo si Brillantes sa iyang pasidaan kaniadto nga moluwat siya sa pangatungdanan kun dili mahatag sa kagamhanan ang gipangayo nilang dugang budget tungod kay nahimong emosyonal lamang siya niadtong higayona.
Samtang gipaimbestigahan ug gipahimoan og report ni Drilon kang Brillantes ang dakung nagasto sa Commission nga mikabat sa P21 million alang sa mga overseas absentee voters nga niabot lamang sa 200,000 ang mibotar niadtong niaging eleksyon. (PIA-Bohol/ecb)
