SAGBAYAN, Bohol, Oct. 24 (PIA)–Giseguro karon ni Presidente Benigno ‘Noynoy’ Aquino III sa mga Bol-anon nga ang gobyerno adunay igong pondo alang sa relief operations sa mga biktima sa magnitude 7.2 linog nga niigo sa Bohol niadtong Oktubre 15.
Ang Presidente nanguna sa pagpanghatag og relief goods sa 800 ka pamilyang kasamtangang nagpuyo sa mga tolda atubangan sa nagubang munisipyo ning lungsod, Huwebes sa buntag.
Dinhi, gibutyag sa Presidente nga nahatagan na sa nasudnon ug lokal nga kagamhanan og 163,000 ka food packs ang 60,000 ka pamilyang apektado sa maong linog .
Matud pa usab sa Presidente, ang lokal nga kagamhanan sa Sagbayan nakahimo na sa ika-limang higayon sa pagpangapud-apod og tabang sa mga biktima.
Ang Department of Social Welfare and Development (DSWD) nakahatag na usab sa ika-tulong higayon og mga food packs sulod sa duha hangtud sa tulo ka adlaw.
Kini gawas pa sa tabang nga gihatag sa mga nagkalain-laing pribadong hugpong sama sa World Food Progamme, Shelter Box, Red Cross ug uban pang foundations.
Dugang pa sa Presidente, daghang apil sa pribadong sektor nga dili man matawag nga NGOs ang nitabang usab.
Nihangyo ang Presidente sa mga relief organizations ug sa mga lokal nga kagamhanan nga magtambayayong gayud aron makaabot sa mga nanginahanglan ang tabang.
Giingong gipaningkamotan sa gobyerno nga matarong ang mga nagubang mga imprastraktura apan madugay-dugay pa gayud kini.
Gipaspasan na usab karon sa Department of Public Works and Highways (DPWH) ang pag-ayo sa mga nangagubang dalan.
Matud pa sa Presidente, giseguro sa DPWH nga maayo na nila ang mga nagubang upat ka taytayan sa Nobyembre 20 o mas sayo pa.
Gawas sa munisipyo sa lungsod sa Sagbayan, gibisita usab sa Presidente ang simbahan sa San Agustin ug ang merkado.
Sa wala pa nibisita sa Sagbayan, gibisita usab niya ang munisipyo sa lungsod sa Tubigon, ang Simbahan sa San Isidro, ang merkado ug pantalan sa Tubigon aron makita ang kadaot nga gibilin sa linog sa maong lungsod. (ECB/PIA7-Bohol)