TAGBILARAN CITY, Bohol, Oct. 18 (PIA)–Nanawagan si Presidente Benigno ‘Noynoy’ Aquino III sa mga Bol-anon nga ipahibalo dayon sa ilang mga mayor kun may mabantayan silang daot sama sa mga liki sa istraktura sa ilang mga lugar human ang kusog nga linog nga nitay-og sa lalawigan niadtong Martes, Oktubre 15.
“Ipaalam agad ninyo sa inyong LGU at patingnan kung may duda kayo o kung may mapansin kayong cracks. Ituro ninyo sa ating mga imbestigador,” matud pa sa Presidente atol sa pakigpulong sa mga ahensiya sa gobyerno dinhi sa lalawigan sa Bohol niadtong Miyerkoles.
Gitumbok sa Presidente nga kinahanglang ipahibalo sa mga eksperto kun may makitang unsa mang kadaot aron mahatagan og pagtagad sa gobyerno ang maong istraktura.
Gimanduan sa Presidente ang Department of Public Work and Highways (DPWH) nga makig-alayon sa Provincial Engineering Office aron masiguro nga tanang mga istraktura masusi gayud og maayo tungod sa kusog nga linog ug mga aftershocks nga padayon pang nasinati sa mga dapit nga gitay-og sa kusog nga linog niadtong Martes.
Ang pinakabag-ong Building Code niadto pang 2010 nga gipatuman karon, nagtakda og mga angay nga ipatukod nga bag-ong istraktura nga dili maguba kun adunay linog nga 7.2 ang gikusgon, pahinomdom pa sa Presidente.
Gidugang pa sa Presidente nga ang problema mao ang mga karaang istraktura.
Matud pa sa Presidente nga adunay sumbanan nga gitawag nga retrofitting aron makasunod sila sa Building Code nga ang tuyo mao ang masiguro ang kaluwasan nila. (PIA7-Bohol/ECB)