TAGBILARAN CITY, Bohol, Sept. 27 (PIA)–Gikumpirmar karon sa Department of Foreign Affairs (DFA) ang gitakdang pagbisita ni Presidente Benigno ‘Noynoy’ Aquino III sa South Korea sa Oktubre 17-18, 2013.
Matud pa sa DFA, ang maong state visit ni Presidente Aquino base sa imbitasyon ni South Korean President Park Geun-hye.
Gitakdang ipahigayon sa duha ka pangulo ang ilang unang summit meeting diin tukion ang bilateral issues apil na ang kooperasyong politikal, depensiba ug ekonomiya.
Makigpulong usab si PNoy sa mga negosyante aron aghaton nga mamuhunan sa Pilipinas.
Gawas niini, makigkita ang Pangulo sa mga Pinoy sa Seoul.
Marso 3, 1949 sa dihang gipalig-on ang relasyon sa Pilipinas ug South Korea.
Sapagkakaron, apil ang Republic of Korea sa mga nag-unang trade partner sa nasud.
Pinakadaghan ang mga Koreano isip turista sa nasud diin kapin sa usa ka milyon ang mibisita sa Pilipinas niadtong 2012. (PIA-Bohol/ec)
De Lemos, bag-ong OIC NBI director
TAGBILARAN CITY, Bohol, Sept. 27 (PIA)–Gibutang karon ni Department of Justice (DoJ) Secretary Leila de Lima si Assistant Director Medardo de Lemos isip bag-ong officer-in-charge sa National Bureau of Investigation (NBI).
Kini human niduso sa irrevocable resignation si kanhi NBI Director Nonnatus Rojas niadtong Setyembre 3, 2013.
Sakop sa trabaho sa OIC ang administrasyon sa operasyon sa NBI base sa gipagawas nga Department Order No. 712 sa DoJ.
Apan matud pa ni De Lima, dili na sakop sa trabaho ni De Lemos ang paglagda sa mga kontrata, pagtangtang og empleyado ug uban pang hisgotanan sa policy determination.
Epektibo ang maong kamanduan hangtud dili pa makatudlo og bag-ong direktor si Presidente Benigno ‘Noynoy’ Aquino III.
Si De Lemos nahimong assistant director ni Rojas kaniadto ug sa wala pa kini nahimong assistant director, siya ang NBI director sa rehiyon 7. (PIA-Bohol/ecb)