TAGBILARAN CITY, Bohol, Oct. 18 (PIA)–Gi-anunsyo kagahapon sa Department of Foreign Affairs (DFA) ang gitakdang pagbisita ni Presidente Benigno “Noynoy” Aquino III ug mga miyembro sa iyang Gabinete sa New Zealand sa Oktubre 22-23 ug sa Australia sa Oktubre 24-26.
Matud pa sa DFA, ang pagbisita sa Presidente sa New Zealand naggikan sa imbitasyon nila New Zealand Prime Minister John Key ug Australian Prime Minister Julia Gillar aron mas mapalig-on pa ang bilateral relations tali sa Pilipinas ug sa duha ka nasud.
Makauban sa Presidente sa iyang pagbisita sa New Zealand ug Australia sila Foreign Affairs Sec. Albert del Rosario, Trade Industry Sec. Gregory Domingo, Defense Sec. Voltaire Gazmine ug uban pang Cabinet secretaries nga makigpulong sa ilang counterparts.
Katuyuan usab sa pagbisita sa New Zealand nga mapalambo pa ang relasyon sa nasud kalabot sa political, defense ug development cooperation ug ang maayong relasyon tali sa duha ka nasud.
Gikan New Zealand, mo-deretso na ang Presidente sa Canberra, Australia alang sa misyon niini nga mas lig-onon pa ang relasyon sa duha ka nahisgotang nasud.
Natino nga adunay 36,000 ka Pinoy ang kasamtangang naa sa New Zealand samtang ang Pilipinas ang ika-10 nga source countries alang sa milabay nga migrant arrivals sa Australia diin mikabat sa 224,000 ka Pinoy dinhi ang natala. (PIA-Bohol/ecb/I-ed)
