MANILA, Jan. 10, 2014 (PIA)–Gipasalamatan ni Presidente Benigno ‘Noynoy’ Aquino III ang mga nagkalain-laing grupo ug nasud nga mitabang sa Pilipinas human nahiagom sa sunod-sunod nga kalamidad ug krisis sa niaging tuig.
Sa iyang pahayag sa New Year Vin d’Honneur sa Malakanyang karong adlawa, miingon si Presidente Aquino nga dili makalimtan sa mga Pilipino ang gibubo nga tabang sa panahong nanginahanglan ang nasud.
“To everyone gathered here, it is with a sincere sense of gratitude that I tell you: the Filipino people remember who their friends are. Filipinos never forget an instance of kindness, and will constantly look for ways to repay those who stood by them in the most difficult times. In our language, we call this ‘utang ng loob,'” pahayag pa ni Aquino.
Giingong nahimong dalan usab ang maong mga pagsulay sa Pilipinas aron mapalapdan pa ang relasyon niini sa ubang mga nasud.
Pipila sa mga nisuway paghagit sa kalig-on sa mga Pilipino sa tuig 2013 mao ang giyera sa Zamboanga, ang magnitude 7.2 nga linog sa Bohol ug ang labing kusog nga bagyo sa kasaysayan sa nasud ang bagyong “Yolanda.”
Ang Vin d’Honneur gikan sa tradisyong French nga matag tuig gipahigayon sa Malakanyang diin makauban sa Presidente ang mga opisyal sa gobyerno ug ilang mga kabanay, mga miyembro sa diplomatic corps ug uban pang naa sa social circle.
Samtang base sa website sa Foreign Aid Transparency Hub (FAiTH), nikabat na sa P23.79 bilyon ang tabang nga nadawat sa Pilipinas diin P20.99 niini dili salapi, samtang P592.58 milyon lamang ang nadawat sa gobyerno. (PIA7-Bohol/ECB)