TAGBILARAN CITY, Bohol, April 08 (PIA)–Nakadawat karon og pasidunggog gikan sa World Health Organization si Presidente Benigno “Noynoy” Aquino III nga outstanding leadership for public service award dungan sa pagsaulog sa World Health Day 2013.
Mismong ang Presidente ang midawat sa maong pasidunggog gikan kang WHO regional director for Western Pacific Dr. Shin Young-soo, sa seremonya nga gipahigayon sa WHO Conference Hall sa UN avenue ganinang buntag.
Kini ang labing unang higayon nga gihatagan og pasidunggog sa WHO ang usa ka presidente sa Pilipinas.
Gi-ila sa WHO ang mga natabang ni Presidente Aquino aron proteksyunan ang pampublikong panglawas sa katawhan nga giingong base usab sa prinsipyo sa WHO.
Gitumbok sa WHO ang pagduso ni Presidente Aquino sa sin taxes law o ang balaod nga dugangan ang buhis sa sigarilyo ug bino ug ang Reproductive Health o RH law nga naghatag usab og access sa mga Pilipino sa health care ug insurance. (PIA-Bohol/ecb/i-gg)
Dili na kinahanglang mopasaka pa og diplomatic protest batok sa US – Palasyo
TAGBILARAN CITY, Bohol, April 08 (PIA)–Gitataw sa Malakanyang nga igo na ang kantidad isip kompensasyon sa Estados Unidos sa kadaot nga gibilin sa pagkasangad sa USS Guardian sa Tubbataha Reef.
Taliwa kini sa panawagang angay dugangan ang $1.4 milyon nga multa ug angay kasuhan usab pinaagi sa diplomatic protest ang Estados Unidos.
Matud pa ni Deputy Presidential Spokesperson Abigail Valte, ang maong kantidad gikan sa Tubbataha Management Office (TMO) sigon sa Tubbataha Reefs Natural Park Act of 2009 nga nahimong basehan sa multa.
Dugang pa ni Valte, dili na usab kinahanglang mopasaka og diplomatic protest tungod kay nitabang man ang US ug misaad alang sa rehabilitasyon sa marine sanctuary.
Ang Tubbataha Reefs Natural Park gilangkoban sa halos 100,000 ka ektarya nga gitawag nga ‘high quality marine habitats’ diin gipuy-an kini sa mga iho, balyena, naa sa 500 ka uban pang matang sa isda, mga iyon, Napoleon wrasse ug kapin 350 ka coral species.
Deklarado kining World Heritage Site sa United Nations Educational, Scientific and Cultural Organization. (PIA-Bohol/ecb/i-gg)