TAGBILARAN CITY, Bohol, Mar. 26 (PIA)–Gimando ni Presidente Benigno ‘Noynoy’ Aquino III ang pag-umol og usa ka balaod nga ihulip sa gibabagan niyang Magna Carta for the Poor.
Matud pa ni Department of Social Welfare and Development (DSWD) Secretary Dinky Soliman, apil siya sa mo-umol sa substitute bill kauban si Socio-Economic Planning Secretary Arsenio Balisacan.
Pasabot pa ni Soliman, katoyuan sa Magna Carta for the Poor nga mahatagan og patas nga katungod ang mga kabus nga Pilipino sa pabalay, pagkaon, edukasyon ug kahimsog sa panglawas.
Giingong daghan nang proyekto ang gobyerno karon nga nitubag niini, apan sama sa giingon ni PNoy nga lisud pang mapatuman ang Magna Carta for the Poor tungod sa kakulang sa pondo.
Tungod niining maong isyu, gimando na ni PNoy ang pag-umol og substitute bill diin target nila nga mas himuong detalyado ang kuhaan sa pondo ug pagpatuman sa balaod alang sa mga kabus.
Target sa gabinete ni PNoy nga ma-presentar nila sa unang adlaw sa bag-ong Kongreso ang ihulip nga balaodnon alang sa Magna Carta for the Poor. (PIA-Bohol/ecb/i-gg)
CHED, kutihon og maayo ang aplikasyon alang sa tuition fee increase
TAGBILARAN CITY, Bohol, Mar. 26 (PIA)–Giseguro sa Commission on Higher Education (CHED) nga dili nila aprubahan ang mga petition for tuition fee increase nga dili mo-agi sa konsultasyon sa mga stake holders sama sa mga estudyante.
Matud pa ni CHED Executive Director Atty. Julito Vitriolo, sa Abril nila i-proseso ang tanang mga aplikasyon ug ipagawas nila ang resulta sa ilang desisyon sa Mayo.
Giingong nag-unang gikinahanglan ang sertipikasyon gikan sa mga estudyante aron masiguro kun tinuod ba nga may gipahigayon nga konsultasyon sa gipangayong tuition fee increase.
Ipa-agi pa sa makuting pagtuon ang matag aplikasyon ug ang mga unibersidad lamang nga angayan ang tugotan sa ahensya nga mangayo og omento.
Sa 1,800 ka higher education institutions (HEIs) sa tibuok nasud, 451 ang nipasaka og petition for increase in tuition rates ug ubang bayronon ning umaabot school year. (PIA-Bohol/ecb/i-hd)