TAGBILARAN CITY, Bohol, Feb. 11 (PIA)–SA labing unang higayon, nitaak sa kampo sa Bangsamoro Leadership and Maguindanao Institute (BLMI) Compound sa Sultan Kudarat ang Presidente sa Pilipinas.
Kini aron ilusad ang “Sajahatra Bangsamoro,” usa ka socio-economic initiative sa gobyerno aron mapasaka ang kalidad sa kahimsog, edukasyon ug panginabuhian sa mga Bangsamoro.
Sa iyang speech, gihulagway ni Presidente Benigno “Noynoy” Aquino III ang dili sayon nga proseso sa panaghisgotay sa kalinaw kaniadto tali nila ni Moro Islamic Liberation Front (MILF) Chairman Al Haj Murad apan gikalipay niya ang pagsinabtanay nga ilang nakab-ot sa katapusan.
Matud pa sa Presidente nga unang nakab-ot ang kalampusan sa peace negotiation sa dihang gihimo ang labing-unang framework agreement tali sa MILF ug gobyerno ug gilagdaan niadtong Oktubre 2012.
“Nagsimula po ang kasalukuyang kabanata hindi dito sa Sultan Kudarat at hindi rin sa Maynila. Una ko pong nakaharap ang ating kapatid na si Al Haj Murad Ibrahim sa bansang Hapon noong Agosto 2011. Naging masalimuot ang una kong pakikipagpulong kay Al Haj Murad…Ngunit nagdesisyon tayo na kailangan magpunla ng tiwala.”
“Hindi madaling magbukas ng puso sa gobyerno, ngunit nakita ni Al Haj Murad, ito ang paghinog ng sakripisyo ninyo,” matud pa ni PNoy.
Sa maong seremonya, gihatagan sa gobyerno og mga PhilHealth cards ang mga napiling Bangsamoro beneficiaries, nga nisimbolo nga kausa na nila sa healthcare program ang gobyerno.
Nanghatag usab og mga certificate of eligibility ang Department of Education (DepEd), Commission on Higher Education (CHED) ug Technical Education and Skills Development Authority (TESDA) sa mga Bangsamoro.
Ang Department of Social Welfare and Development (DSWD) ug Department of Agriculture (DA) nangapud-apud usab og mga certificate of livelihood program sa mga benepisyaryo sa Sajahatra. (PIA-Bohol/ecb/i-gg)
