TAGBILARAN CITY, Bohol, Jan. 17 (PIA)–GIMANDUAN ni Presidente Benigno “Noynoy” Aquino III ang Armed Forces of the Philippines (AFP) ug ang Philippine National Police (PNP) nga siguraduhon ang patas ug limpyo nga eleksiyon sa Mayo.
Sa turnover ceremony sa headquarters sa AFP sa Camp Aguinaldo, Quezon City, miingon ang Presidente nga katungdanan sa AFP ug PNP nga protektahan ang tingog sa mga tawo.
“Ang hamon ko po sa inyo, ang AFP kasama ang ating kapulisan, ang may obligasyon na siguraduhin ma maidaraos nang mapayapa at may integridad ang darating na halalan…nais nating mangibabaw ang boses ng bayan at hindi ito mabusalan ng armas, takot at karahasan,” matud pa ni Aquino.
“Saligang Batas ang dapat ninyong kilingan. Taong bayan ang dapat ninyong papanigan. Pangalagaan ninyo ang karapatan ng mga mamamayan na malayang makapili ng kanilang mga pinuno. Ang gusto natin tapat, patas at naaayon sa batas ang darating na eleksyon mula sa kampanya hanggang sa proklamasyon ng mga bagong pinuno,” dugang pa sa Presidente.
Samtang gihagit ni Presidente Aquino ang bag-ong AFP chief of staff nga si Lt. Gen. Emmanuel Bautista nga ipadayon ang epektibong paghatag og proteksyon sa Armadong Kusog ngadto sa katawhan taliwala sa kakulang sa gidaghanon sa mga sundalo ug nagkadakung populasyon sa nasud.
Matud pa ni Aquino nga ang kakulang sa mga sundalo masulbad pinaagi sa pagpaubos sa mga sundalo sa mas hingpit nga pagbansay-bansay ug paghatag og saktong pahulay sa mga sundalong kanunay ipadala sa operasyon.
Ang Presidente nagkanayon nga nigahin na ang iyang administrasyon og P75 bilyon alang sa sunod nga lima ka tuig ubos sa AFP modernization program.
Sa Enero 20 pormal nang mosulod sa opisina si Gen. Bautista isip hulip ni Gen. Jesse Dellosa nga mi-alagad isip AFP chief of staff sa milabay nga 13 ka buwan. (PIA-Bohol/ecb/i-gg)
